Вакцины бүрэн тунгаа хийлгэсэн иргэдийн 0.44% нь коронавирусийн халдвар авчээ
Эрүүл мэндийн яамны мэдээллийн цагт Дархлаа судлаач, хүний их эмч, доктор Д.Мандахнаран оролцон вакцинтай холбоотой мэдээллүүдийг өглөө.
Дархлаа судлаач, доктор Д.Мандахнаран "Дэлхийн улс орнууд вакцинтай холбоотой мэдээллээ ил тод зарлаж байгаа. Вакцинжуулалт нь ид өрнөж буй АНУ-ын мэдээллийг авч үзье. Тус улсын Өвчний хяналт, сэргийлэлтийн төв тавдугаар сарын 17-нд 123 сая хүнд коронавирусийн халдварын эсрэг вакцин хийгээд байгаа тухайгаа мэдээлсэн.
Одоогоор вакцин хийлгээд буй 123 сая хүнээс 1,949 нь өвчилсөн. Үүнийг мэргэжилтнүүд тайлбарлахдаа вакцин үр дүнгийнхээ хэмжээнд байгаа тул санаа зовох хэрэггүй гэж байгаа юм. АНУ өөрийн иргэдээ вакцинжуулахдаа Pfizer, Moderna, Jonhson&Jonhson компанийн үйлдвэрлэсэн вакциныг хэрэглэж байгаа.
Вакцин үйлдвэрлэгч нар
- Вакцин тариулсан хүмүүсээс маш цөөхөн нь өвчлөх магадлалтай
- Вакцин тариулаад халдвар авсан хүмүүсийн дийлэнх нь хөнгөн өвчилдөг гэдгийг хэлж байгаа.
Дэлхийд вакцинжуулалтаараа тэргүүлж байгаа нь Израил улс. Харин хөгжиж буй орнууд дундаа манай улс тэргүүлж буй. Хөгжиж буй орнуудад нийт вакцины 0.3% нь оногдож байгаа бөгөөд хөгжсөн, эдийн засгийн боломжтой улс орнууд вакциныг хамж авч байгаа гэх шүүмжлэл ил тодоор өрнөсөн. Иймд хөгжиж буй болон буурай орнуудад вакциныг хэрхэн хүртээмжтэй хуваарилах, КОВАКС хөтөлбөрт яаж хамруулах вэ зэрэг нь томоохон асуудал болж байна" гэсэн юм.
Манай улсын хувьд коронавирусийн халдварын эсрэг вакцины бүрэн тунд 770 гаруй мянган хүн хамрагдсанаас 0.44% нь коронавирусийн халдвар авсныг ЭМЯ-ны Хэвлэлийн төлөөлөгч Б.Ууганбаяр хэлэв.
"Давтан тунг хийлгэхэд харьцангуй бага хариу урвал өгнө"
Иргэд эхний тунгаа хийлгэсний дараа хариу урвал их өгсний улмаас давтан тундаа хамрагдах идэвх буурч, халшрах тохиолдол гарч байгааг Эрүүл мэндийн яамны хэвлэлийн төлөөлөгч Б.Ууганбаяр хэллээ.
Хариу урвал өгч буйн учрыг доктор Д.Мандахнаран "Эхний тунг хийлгэхэд хүний биед гаднын цоо шинэ уураг орж буй учир бие махбод хүчтэй хариу урвал өрнүүлж, ерөнхий дархлаа тогтдог. Ингэхдээ олон төрлийн дархлаа тогтох бөгөөд аль сайныг нь шилж авахын тулд давтан тунг хийдэг. Иймд давтан тунг хийлгэхэд эхнийхээсээ харьцангуй бага хариу урвал өгдөг" гэв.
ВИДЕО:
