Манай улс 2022 онд анх удаа “PISA-2022” сурлагын амжилтын олон улсын үнэлгээнд хамрагдахаар бэлтгэл ханган ажиллаж байна.
Сурлагын амжилтыг үнэлэх олон улсын энэхүү үнэлгээ нь гурван жил тутам зохион байгуулагддаг бөгөөд ерөнхий боловсролын сургалтын хөтөлбөрийн хэрэгжилтийг үнэлэх бус 15-16 насны сурагчид унших, математик, шинжлэх ухааны хичээлээр олж авсан мэдлэгээ амьдрал ахуйдаа ашиглан асуудал шийдвэрлэх чадварыг үнэлэх зорилготой шалгалт юм.
Уг шалгалт нь туршилтын болон үндсэн гэсэн хоёр шаттай зохион байгуулагддаг. Туршилтын шалгалт нь сурагчдын гүйцэтгэх дасгал даалгавар, сурлагын амжилтад нөлөөлж байгаа хүчин зүйлийг тодорхойлох асуулгын тохирц, нийцийг тандах зорилготой бөгөөд үндсэн шалгалт 2022 онд зохион байгуулагдана.
Дэлхий нийтийг хамарсан цар тахлын энэ цаг үед манай улс туршилтын шалгалтыг Улсын Онцгой комиссын зөвшөөрлийн үндсэн дээр халдвар хамгааллын дэглэм баримтлан 2021 оны 5 дугаар сарын 17-24-ний өдрүүдэд зохион байгуулж байна.
Туршилтын шалгалтад манай улсын ерөнхий боловсролын 19 сургууль /нийслэлийн 10, орон нутгийн 9/-ийн 700 гаруй сурагчид хамрагдаж байна.
Ирэх онд PISA-д 90 орчим улсын 15 настнууд оролцож, мэдлэг чадвараа шалгуулна.
Эх сурвалж: Боловсролын үнэлгээний төв