Фүкүшимагийн хордсон уснаас ууж үзүүлэхийг Хятадын тал Япон улсын шадар сайдаас хүсжээ
Мягмар гарагт Япон улс Фүкүшимагийн атомын цахилгаан станцын ослын үеэр хөргөлтөд ашигласан их хэмжээний усыг далайд асгах шийдвэрээ зарласан билээ.
Тухайн өдөр болсон хэвлэлийн хурлын үеэр Японы засгийн газрын шадар сайд Таро Асо “Усыг сайн цэвэрлэсэн тул уух ч боломжтой гэж надад хэлсэн” гэж ярьсан юм.
2012 оноос хойш шадар сайд, сангийн сайдын үүргийг хавсран гүйцэтгэж байгаа Асо нь үе үе дуулиантай мэдэгдэл хийдгээрээ алдартай хүн.
Өчигдөр Хятад улсын гадаад хэргийн яамны хэвлэлийн төлөөлөгч Зао Лижан сэтгүүлчидтэй уулзах үеэрээ “Японы албаны хүн саяхан уг усыг уухад аюулгүй гэж хэлсэн. Түүнээс ууж үзүүлэхийг хүсэж байна” гэж хэлжээ.
“Минаматагийн гамшиг болоод удаагүй, хохирогчдын шарх эдгээгүй байна. Япон улс энэхүү түүхэн эмгэнэлт явдлаа мартах ёсгүй” гэж мэдэгдсэн Зао цацраг идэвхит бодисоор хордсон усыг хөрш орнууд болон Олон Улсын Атомын Эрчим Хүчний Агентлагтай зөвшилцөлгүйгээр далайд асгахгүй байхыг Япон улсын засгийн газарт уриалсан юм.
Күмамото мужийн Минамата хотын ойролцоох химийн үйлдвэр мөнгөн усаар бохирдсон усыг далайд асгаснаас нутгийн иргэдийн төв мэдрэлийн систем гэмтэж, хүүхдүүд гаж хөгжилтэй төрж байв.
Олон мянган хүн хохирсон энэ гамшгийг Японы эрүүл мэндийн байгууллага 1956 онд албан ёсоор хүлээн зөвшөөрч байжээ.
Цацраг идэвхит бодисоор хордсон усыг далайд асгах шийдвэрийг Хятадаас гадна Өмнөд Солонгос, Тайвань улсууд эсэргүүцэж байгаа. Харин Япон улсын засгийн газар усыг аюулгүй түвшинд хүртэл нь цэвэршүүлэхээ амлаж, хөрш улсуудаа хортой хаягдал усаа далайд асгадаг хэмээн хариу шүүмжилжээ.
Эх сурвалж: Kyodo News
