Багш Т.Мөнхцэцэг, Д.Наранцэцэг нарт Япон улсын Засгийн газрын “Мандах нар” одонг гардуулав
Өнөөг хүртэл байгуулсан гавьяаг нь үнэлэн сайшааж, Японы Засгийн газраас 2020 оны гадаадын иргэдэд олгох шагналыг Монгол Улсын иргэн, МУИС-ийн Ази судлалын тэнхимийн япон хэлний зөвлөх багш Т.Мөнхцэцэг болон МУИС-ын япон хэлний багш асан Д.Наранцэцэгт нарт хүртээх шийдвэр гарсан билээ.
Үүнтэй холбогдуулан, шагнал гардуулах ёслолыг гуравдугаар сарын 29-ний өдөр (Даваа гараг) Япон улсын Элчин сайдын яаманд зохион байгууллаа.
Өргөмжлөл болон одонг Япон Улсаас Монгол Улсад суугаа Онц бөгөөд Бүрэн эрхт Элчин сайд Х.Кобаяши гардуулав.
МУИС-ийн Ази судлалын тэнхимийн япон хэлний зөвлөх багш Т.Мөнхцэцэгт “Мандах нар” одонгийн “Хүзүүний тууз бүхий Алтан туяа” зэрэглэлийн одонг гардуулав
Зөвлөх багш Т.Мөнхцэцэг нь Япон, Монгол Улс дипломат харилцаа тогтоогоод удаагүй байсан 1976 онд Монгол Улсын шилдэг сургууль болох Монгол Улсын Их сургуульд япон хэлд суралцаж төгсөөд Монгол Улсын Шинжлэх ухааны академийн судалгааны хүрээлэнд ажлын гараагаа эхлүүлжээ.
Мөн Монгол Улс дахь Япон судлалын хөгжилд хувь нэмрээ оруулжээ. Тэрээр Монголын Япон судлалын нийгэмлэгийг үүсгэн байгуулсан хүмүүсийн нэг бөгөөд эрдэм шинжилгээний хурлын бэлтгэл, диплом, эрдэм шинжилгээний ажлуудыг хянах зэргээр Монгол дахь япон судлалын хөгжилд хувь нэмрээ оруулсаар ирсэн.
Түүнчлэн Т.Мөнхцэцэг нь Японы түүх, соёлын судлаач төдийгүй МУИС-д япон хэл зааж, Монголд япон хэлний боловсролыг түгээн дэлгэрүүлэхэд хувь нэмрээ оруулсан. 1991 онд Монголд социалист тогтолцоо нуран унаж, ардчилсан нийгэм эхлэх үед байгуулагдсан МУИС-ийн Япон судлалын тэнхимд багшаар шилжин ирж, өнөөдрийг хүртэл 30 гаруй жил япон хэл зааж сургах үйлсэд хувь нэмрээ оруулжээ. Одоо түүний олон шавь япон хэлээ ашиглан их сургуулийн багш, япон хэлний багш, японы компаниуд зэрэг олон салбарт Япон, Монголын найрамдлын гүүр болон үр бүтээлтэй ажиллаж, хоёр орны харилцааг хөгжүүлэхэд хувь нэмрээ оруулж байна.
Япон, Монголын эрдэм шинжилгээний салбарын харилцаа болон хоёр орны харилцан ойлголцлыг гүнзгийрүүлэхэд ийнхүү түүний оруулсан хувь нэмрийг үнэлжээ.
МУИС-ийн Япон хэлний багш асан Д.Наранцэцэгт “Мандах нар” одонгийн “Сарнай цэцэг бүхий Алтан туяа” зэрэглэлийн одонг гардуулав
Д.Наранцэцэг нь Япон, Монгол Улс дипломат харилцаа тогтоогоод удаагүй байсан 1977 онд Монгол Улсын шилдэг сургууль болох Монгол Улсын Их сургуульд япон хэлний анхны ангийг төгссөн. Түүний дараа тус сургуульдаа япон хэлний багшаар ажиллаж, 15 жил гаруй уран зохиол, хуулийн тэнхимүүд болон оройн ангийн олон оюутанд япон хэлийг зааж, Монголд япон хэлний боловсролыг түгээсэн анхдагч багш нарын нэг нь билээ.
Мөн 1992 онд “ЖАЙКА” Японы Олон улсын хамтын ажиллагааны байгууллага Монгол улсад залуу сайн дурын гишүүнийг томилон ажиллуулж эхэлсэн тухайн үед Д.Наранцэцэг нь Монгол Улсын Их сургуулийн ажлаасаа гарч, Япон улсад очин, Японы Нагано мужийн Комаганэ хот, Фүкүшима мужийн Нихонмацү хотын сургалтын газарт Монголд томилогдон ажиллах анхны залуу сайн дурын гишүүнээс эхлэн 25 жилийн турш олон хүнд монгол хэлийг зааж сургажээ.
Д.Наранцэцэг нь Япон, Монгол хоёр орны хамтын ажиллагааг хөгжүүлэхэд хувь нэмэр оруулж буй залуу сайн дурын гишүүдэд япон хэл заах зэргээр хоёр орны харилцан ойлголцол болон хамтын ажиллагааг гүнзгийрүүлэхэд ихээхэн хувь нэмэр оруулсан тул ийнхүү үнэлсэн байна.
