Уншиж байна ...
Зураг
Зураг
ХУУЧИРСАН МЭДЭЭ: 2021/03/25-НД НИЙТЛЭГДСЭН

АU PMC ХХК-ийн Захирал А.Уянга: Үл хөдлөх хөрөнгийн менежментийн үйлчилгээ гэдэг нь "Өмчийг он удаан жил үнэ цэнээ алдахгүй байлгах"

ikon.mn
2021 оны 3 сарын 25
Сурталчилгаа
ҮЛ ХӨДЛӨХ ХӨРӨНГИЙН МЕНЕЖМЕНТИЙН ҮЙЛЧИЛГЭЭ ГЭДЭГ БОЛ ТОВЧХОНДОО ТУХАЙН ӨМЧИЙГ ОН УДААН ЖИЛ ҮНЭ ЦЭНЭЭ АЛДАХГҮЙ БАЙЛГАХ Л ГЭСЭН ҮГ

ЦУВРАЛ-1: Орон сууцны СӨХ-ны үйл ажиллагааны оновчтой төлөвлөлт

"Хэрэв төлбөрөө удаан хугацаагаар төлөөгүй бол өмчлөх эрхээс нь түдгэлзүүлж, байрыг шууд хурааж авах хуулийн заалт хүртэл байдаг"

Манай улсад Үл хөдлөх хөрөнгийн менежментийн үйлчилгээ хөгжөөд 10 гаруй жил болжээ. Энэхүү үйлчилгээгээр мэргэшсэн “AU Property Management Consulting” ХХК-ийн захирал А.Уянгатай орон сууцны хорооллын СӨХ болон оффисийн менежментийн үйл ажиллагаа, тэдгээрийн хууль эрх зүйн орчны талаар цуврал ярилцлагыг та бүхэнд хүргэж байна.

Компанийн нэр: “AU Property Management Consulting” LLC

Захирлын нэр: А.Уянга

 

Туршлага:

  • “Pro One” оффисын хөрөнгийн менежмент 2016-2017
  • “Хоймор” оффисын хөрөнгийн менежмент 2017-2019
  • Үл хөдлөх хөрөнгийн менежментийн “Аясгал цэн” ХХК 2020 оноос одоог хүртэл
  • “Барилгын дэвшилтэт технологийн төв”-ийн хөрөнгийн менежментийн үйлчилгээ 2020 оноос одоог хүртэл
  • “Хийморь” тансаг зэрэглэлийн хотхоны хөрөнгийн менежментийн үйлчилгээ 2020 оноос одоог хүртэл

Мэргэшил:

  • Япон улсад “Оффисийн хөрөнгийн менежментийн үйлчилгээний судалгаа”-  2017
  • Япон улсад “Tансаг зэрэглэлийн орон сууцны төслийн судалгаа”-  2018
  • Монгол Япон төвийн Жижиг дунд аж ахуйн нэгжийн менежментийг сайжруулах “Бизнесийн үндсэн сургалт” - 2019
  • “Real Estate Academy of Mongolia” – Ментор
  • “Үл хөдлөх хөрөнгийн бизнес эрхлэгчдийн ГҮҮР нэгдсэн холбоо” ТББ-н ТУЗ-н гишүүн

-Монгол улсад сүүлийн үед үйлчилгээний бизнес эрчимтэй хөгжиж байна. Тиймээс юун түрүүнд үл хөдлөх хөрөнгийн менежментийн үйлчилгээний талаар асуух нь зүйтэй болов уу?

Үл хөдлөх хөрөнгийн менежментийн үйлчилгээ гэдэг бол товчхондоо тухайн өмчийг он удаан жил үнэ цэнээ алдахгүй байлгах л гэсэн үг. Энэ нь Америк болон Европ тивд үүсээд 100 гаруй жил, Азийн чинээлэг орнуудад үүсээд 30 аад жил харин манайд 10 гаруй жилийн өмнөөс барилгын томоохон төсөл хэрэгжүүлдэг компаниуд ярьж, анхаарч ирсэн үйлчилгээ юм. Тансаг зэрэглэлийн үл хөдлөх хөрөнгийн ашиглалт үйлчилгээг дагаж хөгжиж ирсэн гэж хэлж болно. Манай улсад дийлэнх тохиолдолд Хөрөнгийн менежментийн үйлчилгээ, үйл ажиллагааг орон сууцны СӨХ-н үйлчилгээ гэсэн буруу ойлголттой явсаар ирсэн. Нэг талаасаа СӨХ-н үйлчилгээ хамаарах боловч нэгдсэн нэг удирдлагатай, мэргэшсэн баг бүрэлдэхүүнтэй, байгууллагын түвшинд үйл ажиллагаатай, ашгийн төлөө гэдгээрээ ялгаатай. Мэргэжлийн талаас нь тайлбарлавал үндсэн гурван ойлголт байгаа. Нэгдүгээрт Asset management буюу нэг талаасаа хөрөнгийн эзний хөрөнгийг хэрхэн зөв удирдах, нөгөө талаас  хөрөнгө оруулагч гэсэн үг. Илүү санхүүгийн менежмент, хөрөнгө оруулалт чиглэл рүү зөвлөгөө өгч, удирдаж ажиллахыг хэлдэг. Үүний дараагаар Facility management буюу барилга байгууламжийн удирдлага. Энэ нь бидний хэлж сурснаар орон сууц, оффисын ашиглалтын үйлчилгээ, СӨХ-н үйлчилгээг ойлгож болно. Нэмээд сүүлийн үед консьерж үйлчилгээ нэвтрээд байна. Харин гуравдугаарт буюу хамгийн сүүлд нь үл хөдлөх хөрөнгийн чиглэлийн судалгаа, концепц, маркетинг, борлуулалт, түрээсийн менежментийн үйлчилгээг хамруулсан Борлуулалтын цог үйлчилгээ орно. Эдгээрээс түрээсийн менежментийн үйлчилгээг тодруулж хэлэхэд өмчийн эзний өмнөөс үл хөдлөх хөрөнгийн түрээсийн үйл ажиллагааг удирдан зохион байгуулах ба үүнд нь түрээслэгч олж өгөх, гэрээ байгуулах, төлбөр тооцоог гүйцэтгүүлэх, цэвэрлэгээ үйлчилгээ болон засвар үйлчилгээг хариуцан гүйцэтгэх үйлчилгээг хэлнэ. Ийм цогц бөгөөд өргөн хүрээний ажлыг бид хийж гүйцэтгэж байна.

-Манай улсад эдгээр үйлчилгээг бүрэн үзүүлж чадаж байна уу? Бусад орны жишгээс харахад хэр амжилттай явж байна.

Япон, Сингапур, Солонгос зэрэг улсыг бодоход 20-иод жилээр хоцорч яваа. Харин Казахстан, Киргиз, Украйн гэх мэтийн орнуудад энэ үйлчилгээний талаар цогц ойлголт бараг л байхгүй. Бид илүү хурдан хөгжиж, үйлчилгээгээ тодорхой түвшинд маш сайн үзүүлж чадаж байгаа гэж үзэж байна. Монголчууд шинэ зүйл сурахдаа маш хурдан хүлээж авдаг суралцагч ард түмэн шүү дээ. Тэгэхээр хэдийгээр бага зэрэг хоцорч яваа ч бусад тэргүүлэгч орнуудын зэрэгт хурдан хүрчихнэ гэж боддог. Гол нь нийт иргэддээ үйлчилгээнийхээ тухай ойлголтуудыг зөв өгч, төрийн байгууллагуудтай нягт ажиллах нь их чухал. Манай иргэд нийтийн эзэмшлийн талбай, дундын эзэмшлийн талбайн тухай ойлголтоо ч сайн ялгаж салгаж чаддаггүй. Тэр бүү хэл “манайх ус алдаад байна СӨХ өө” гэж дуудлага өгдөг. Ямар үйлчилгээг хэнээс авах талаар ч мэддэггүй. 

Эдгээрээ зөв ойлгох нь чухал үүнээс болоод оршин суугч, СӨХ хоёрын хооронд эцэс төгсөлгүй дайн эхэлдэг. СӨХ-ийн төлбөрөө төлөхгүй, гэрээ байгуулдаггүй. Тэгсэн хирнээ үйлчилгээгээ авсаар байдаг. Оршин суугчдын 60 хувь нь СӨХ-н үйлчилгээндээ сэтгэл хангалуун, үлдсэн 40 хувь нь хангалуун бус байдаг нь судалгаагаар гарсан байдаг. Тэгэхээр бид үйлчилгээгээ хангалттай хэмжээнд зөв удирдан зохион байгуулж чадаж байгаа юу гэдэгт дүгнэлт хийх хэрэгтэй болов уу. Мөн СӨХ-н үйлчилгээнд сэтгэл хангалуун бус байгаа нэг шалтгаан нь тухайн СӨХ үйл ажиллагаагаа зөв зүйтэй таниулахгүй, ажлаа тайлагнахгүй, оршин суугч нартайгаа харьцахгүй байгаатай холбоотой. Сайн ажиллаж байгаа СӨХолбоод байгаа ч өнөө цагт илүү мэргэжлийн, мэргэшсэн болох шаардлагатай болж байна  гэж хэлмээр байдаг шүү (инээв).

-Саяхан цагаан сарын өмнөх хөл хориогоор нэгэн СӨХ-ийн дарга оршин суугчиддаа мөнгө тараасан. Яаж СӨХ мөнгөтэй болсон хэрэг вэ? СӨХ тэгэхээр ашигтай ажил юм бишүү?

Тэр СӨХ-ийн даргын талаар сонссон. Бахархууштай, бүр очиж уулзаж, яаж тийм мундаг ажилласан тухай туршлага судалж, ярилцмаар санагдсан. Тухайн СӨХ ирээдүйн 5, 10 жилийн дараах их засварын ажилдаа зориулж хуримтлуулсан сангийн төлбөрөөсөө удирдах зөвлөлийн шийдвэрийн дагуу айл бүрт тусламж болгон тараасан байх, ийм үйлдэл хийх боломжтой байлгүй яахав. СӨХ-д хуримтлалын сан гэж заавал байх ёстой, хуулинд тусгасан байдаг. Хуулиндаа Төрийн бус байгууллага байх ёстой гэж заагдсан байдаг болохоор миний бодлоор СӨХ-үүд хөгжихгүй, чанартай үйлчилгээ үзүүлж чадахгүй байгаагийн гол шалтгаан гэж хардаг. Олон улсад оршин суугчдын дундаас төлөөлөл гаргаж үйл ажиллагаагаа удирдуулдаг. Тэд харин өөрсдөө хийгээд явах биш  мэргэжлийн компаниудаас сонгон шалгаруулалт хийж ажиллуулах, тэдгээрийн ажлыг хянах, нийт оршин суугчдад тухайн ажлын үнэн зөвийг батлах, хамтран ажиллахад оролцдог. Мэргэжлийн компанид өгснөөр удирдлагын зардал буурах боломжтой. Манай ихэнх СӨХ-үүд санхүүгийн үйл ажиллагаагаа буруу төлөвлөсөн, хяналтын систем байхгүй, санхүүгийн сахилга батгүй ажиллах, үйл ажиллагааны менежмент муу, оршин суугчдын үйлчилгээний төлбөр төлөлт муу гэх зэрэг нөхцөл байдлаас болж асар их өрөнд орсон гэсэн дүр зураг их байдаг. 

Заавал чадахгүй байж өөрсдөө хийх гээд зүтгээд байх шаардлагагүй. Мэргэжлийн компани Хөрөнгийн менежментийн үйлчилгээг гүйцэтгэснээр ажилчдаа сургах, хөгжүүлэх, нийгмийн асуудлуудыг шийдвэрлэх болон ажилчдаа сэтгэл ханамжтай ажиллах нөхцөлөөр хангах боломжтой болгож чаддаг. Та нар өөрсдийнхөө СӨХ-ийн ажилчдыг хардаг байх. Хамгийн бага цалингаар, хамгийн хүнд хүчир ажлыг менежментгүйгээр, мэргэжлийн бус удирдлагаар удирдуулж, ирээдүйн ажлын сайн карьерын тухай мөрөөдөх ч үгүй ажилладаг. Үйлчилгээ үзүүлж буй ажилчид мэргэжлийн сургалтад хамрагдахгүйгээр, сэтгэл зүйгээ бэлдэхгүйгээр сэтгэлд хүрсэн үйлчилгээ үзүүлэх боломжгүй шүү дээ. 

-Тийм шүү. Таныг ингээд хэлэхэд өөрийнхөө хотхоны СӨХ хэр билээ гэж санагдаж байна. Хуримтлалын санд СӨХ-д төлж байгаа мөнгөний хэдэн хувиар тогтоодог вэ? Тодорхой хувийг зааж өгдөг үү?

Тэгж тодорхой хувиар заадаггүй. Түүнийг СӨХ-ийн удирдах зөвлөлөөрөө шийдээд тарифаа тогтоох ёстой. Тухайн хотхон орон сууцанд хэр олон тоног төхөөрөмж байна, ямар үндсэн хөрөнгүүд бүртгэлтэй гэх мэтийг харгалзуулаад, тэдгээрийн насжилтыг тооцож байж 5, 10 жилийнхээ их засварын ажлыг төлөвлөнө. Тэгж байж айл бүрт ногдох хуримтлалын сангийн дүн гарна. Сангийн зарцуулалтыг удирдах зөвлөлийн хурлаар шийдвэрлэдэг байх ёстой. Ирээдүйд гарах том зардлыг хаах, тоног төхөөрөмжийн гэнэтийн эвдрэлийг засах, томоохон техникийн шинэчлэлд зориулж хуримтлуулаад байгааг ойлгох хэрэгтэй. СӨХ нь хуримтлалын сангаа банкинд хугацаатай хадгаламжид байршуулж зарцуулалтыг ил тод байлгах ёстой.  Нэмж хэлэхэд үндэслэлтэйгээр хуримтлалын сан үүсгэхийн тулд СӨХ-н удирдах зөвлөлд мэргэжлийн инженер байх шаардлагатай байдаг. Эсвэл мэргэжлийн байгууллагад хандаж, тусламж авах боломжтой. Энэ нь хэзээ ямар хэмжээний хуримтлал хэрэгтэй, ямар засварын ажлыг хэзээ хийх вэ гэдгийг үндэслэлтэй гаргахад дөхөм болдог шүү. Хуримтлал юм чинь хамгийн багаар хуримтлуулая гэдэг ойлголт их явдаг, энэ нь яав ч болохгүй. Танай байрны лифт үйлдвэрлэгчээсээ хамаараад үнэ, солих эд анги гээд бүгд өөр үнэтэй байдаг. Тиймээс хуримтлуулах мөнгөө зөв тогтоох хэрэгтэй байдаг шүү гэж хэлмээр байна.  

Би энэ байранд 5-с илүү жил амьдрахгүй юм чинь надад хамаагүй гэсэн ойлголт байж болохгүй, та тухайн байранд амьдарч байх хугацаандаа дундын эзэмшлийн тухай хуулийн дагуу үүргээ биелүүлэх ёстой гэдгийг ухамсарлах хэрэгтэй. Бид л хойч үедээ үлгэр дуурайлал болох хүмүүс. Зарчмаа ойлгоод үүргээ биелүүлдэг маш олон оршин суугчид байдаг нь сайхан шүү.

-Зарчимч, ухамсартай оршин суугчид л яг үнэндээ СӨХ-н үйл ажиллагааг зогсолтгүй явуулдаг гэхэд хилсдэхгүй. Та мэргэжлийн талаас нь зөвлөгөө өгөөч. СӨХ-ийн мөнгөө өгөхгүй байгаа оршин суугчийн асуудлыг хэрхэн шийдэх ёстой вэ?

Дундын эзэмшлийн талбайн ашиглалтын тухай хуулийн дагуу тухайн орон байр, оффисийн өмчийн эзэн СӨХ болон Хөрөнгийн менежментийн төлбөрийг ашигласан ашиглаагүй заавал төлөх үүрэгтэй. Таныг ашигласан, ашиглаагүй дундын эзэмшлийн талбайд цэвэрлэгээ хийгдэнэ, харуул хамгаалалт ажиллана, урсгал засварын ажил хийгдэнэ гэдгийг ойлгох хэрэгтэй. СӨХолбоодод нийтлэг нэг алдаа байдаг нь үйлчилгээ үзүүлэх гэрээгээ оршин суугч нартайгаа байгуулахгүй байна. Гэрээнд ямар ажил үйлчилгээг, хэдэн хүний баг бүрэлдэхүүнээр гүйцэтгэх, ямар эрх үүрэгтэй ажиллах гээд маш дэлгэрэнгүй зааж өгөх ёстой. Гэрээ байгуулаагүйгээс шүүх дээр оршин суугчдын талд шийдэгдэх тохиолдол гардаг. 

Энэ нь шууд тухайн СӨХ-ийн зохион байгуулалтын асуудал болно. Ажил гүйцэтгэх гэрээн дээрээ төлбөр төлөөгүй тохиолдолд авах арга хэмжээг удирдах зөвлөл харилцан тохиролцож зааж өгөх хэрэгтэй. Үйлчилгээ авах эрхээ эдэлж байгаа бол төлбөрөө төлөх үүргээ хүлээх нь шударга шүү дээ. Төлбөрөө цаг хугацаанд нь төлдөг иргэн, ажлаа цаг хугацаандаа гүйцэтгэдэг ажилчид хохирох ёсгүй. СӨХолбоондоо хандаад “орцоо засуулмаар байна” гэхээр “бусад айл чинь мөнгөө төлөхгүй байна. Энэ жил чадахгүй” гэх тохиолдол маш их гардаг. “Цэвэрлэгээ хийж байна. Хогоо хаяж байна” гээд орхичихдог байж болохгүй. Тэр ажлууд хангалттай менежмент болж чадахгүй юм. Мөн тухайн хотхон, орон сууцанд тохирсон нийтээр дагаж мөрдөх, нийтийн эрх ашгийг хамгаалсан, дундын эзэмшлийн талбайн эд хөрөнгийг хамгаалсан дүрэм журам боловсруулж удирдах зөвлөлөөр батлуулан, түүнийг хэвшүүлэх ёстой. Иргэн таны хөрөнгөнд зөвхөн СӨХ-ны дарга биш мэргэжлийн компани, стандарт норм дүрэм, төлөвлөгөөний дагуу санаа тавьж, халамжилж ажиллаж байвал та төлбөрөө цагт нь төлөх үү, гэсэн асуултыг бодоод үзээрэй.

-Тийм шүү. Тэгэхээр манай иргэд СӨХолбооны үйлчилгээг мэргэжлийн байгууллагаар хийлгэж болдог гэдэг мэдээлэл ойлголт байхгүй байна уу?

Магадгүй юм. Бас яг ийм үйлчилгээ үзүүлдэг байгууллагууд маш цөөхөн байна. Олон жил барилгын салбарт хөлөө олсон, тансаг зэрэглэлийн орон сууц, оффисийн төслүүд дээр ажиллаж байгаа компаниуд өөрсдөө Хөрөнгийн менежментийн үйлчилгээгээ хийхийг зорьж байна. Энэ нь ч аргагүй юм. Мэргэжлийн бус хүмүүс ажиллаад төслийн үнэ цэнийг унагадаг. Шинээр хөгжих, олноороо мэргэжлийн үйлчилгээ үзүүлж эхлэх хэрэгтэй. Үүнийг дагаад иргэд ч  аяндаа мэддэг болоод ирнэ. Дээр хэлсэнчлэн манай улсад энэ бизнес хөгжихөд үйлчилгээ авч буй хүмүүсийн ойлголтыг өөрчлөх хэрэгтэй. Мөн хуулийн зохицуулалт их чухал, иргэн бол хуулиа л дагана шүү дээ. Хууль нь зөв зүйтэй зохион байгуулалттай, аль аль талын эрх ашгийг шударгаар хамгаалсан байх ёстой. Жишээ нь: Япон улсад өмчийн эзэд нийлж дундаасаа Сууц өмчлөгчдийн холбоо гэж байгуулаад, үйлчилгээгээ мэргэжлийн компаниар хийлгэчихдэг. СӨХ нь төлбөр төлөх үйл ажиллагаанд ч оролцдоггүй, мэргэжлийн компани бүх асуудлыг шийддэг, зөвхөн санхүүгийн хяналтаа тавьж ажилладаг. Дундын эзэмшлийн талбайн хуулийнхаа дагуу менежментийн төлбөрийг шууд данснаас нь суутгах эрхтэй байдаг. 

Хэрэв төлбөрөө удаан хугацаагаар төлөөгүй бол өмчлөх эрхээс нь түдгэлзүүлж, байрыг шууд хурааж авах хуулийн заалт хүртэл байдаг. Энэ бол өндөр хөгжилтэй улс оронд хэвийн хүлээж авах хуулийн заалт. Манай улсад хууль эрх зүй, иргэдийн хотжих сэтгэлгээ, өмч хөрөнгөө хамгаалах сэтгэхүй өндөр хөгжилтэй улс оронтой ижил түвшинд хүрэх хугацаа 10 жилийн дараа болов уу. Тэр цагт хөрөнгийн менежментийн үйлчилгээний хөгжил зөвхөн мэргэжлийн компаниуд хийж гүйцэтгэснээр хурдацтай, тогтвортой хөгжих болов уу гэж харж байгаа.

-Хөрөнгийн менежментийн үйлчилгээ үзүүлж байгаа ажилчдыг хэрхэн сургадаг вэ? Ямар нэгэн сургалт авсан байх шаардлагатай биз дээ.

Хөрөнгийн менежментийн үйлчилгээ барилгын насжилтыг 50-60 жилээр уртасгадаг. Ямар зэрэглэлийн, ямар зориулалттай барилга байхаас хамааран тухайн ажилтан бүрийг сургах ёстой. Хийж буй ажлынх нь онцлогийг сайн ойлгуулж өгөх хэрэгтэй. Одоогоор манайд тухайлан зориулсан сургалт байхгүй. Гэсэн хэдий ч бид дотоодын сургалтаараа ажилтанаа бэлтгэж гаргах болон хамтран ажилладаг байгууллагуудаас байнга сургалт авдаг. Жишээ нь: Өндөр зэрэглэлийн оффисийн угтах үйлчилгээний ажилтныг харилцааны ур чадвар, ёс зүйн сургалт, бичиг хэрэг хөтлөлт гэх зэрэг сургалтанд хамруулна. Шал угааж чаддаг л бол цэвэрлэгээ сайн хийнэ гэсэн үг биш юм. “Цэвэрлэгээ үйлчилгээ” гэдэг чинь хүний эрүүл байх анхдагч хэрэгцээг хангах ажил шүү дээ. Үүнийг мэргэжил болгох хэрэгтэй. Бүр цэвэрлэгч гэдэг нэршлийг халмаар санагддаг. Үйлчилгээний ажилтан шүү дээ. Наад захын цэвэрлэгээний бодистой хэрхэн харьцах, хувийн болон хамт олныхоо аюулгүй байдлыг хэрхэн хангах тухай ХАБЭА сургалт, харилцааны ур чадвар, стандарт норм дүрэм гэх мэт сургах зүйл маш их байдаг. Үйлчилгээний ажилтныхаа ажлыг бид маш сайн ойлгож, хөдөлмөрийн зах зээл дээрхи дунджаас илүү хөлсөөр цалинжуулдаг.

-Үнэхээр сонирхол татаж байна. Хөршийн холбоо, оршин суугчдын коммунити үүсгэхэд Хөрөнгийн менежментийн компанийн нөлөөлөл байна уу?

Хамгийн их нөлөөлнө. Байгууллагуудад хүний нөөцийн багийнхан сар болгон ажилтнаа халамжилдагтай яг адилхан өмчийн эзэн бүрт үйлчилгээ үзүүлж байгаа гэдгээ маш сайн ойлгож, ухамсарлах хэрэгтэй. Жишээ нь: Хөрөнгийн менежментийн төлбөртөө жаахан зардал тусгаад сар болгон хэрэглэгч халамжлах төлөвлөгөөт ажил зохион байгуулчихдаг байх жишээний. Менежмент хийж буй хотхоныхоо хүүхдүүдэд зориулаад, тухайн сард төрсөн хүүхдүүдийн төрсөн өдрийн бялуу задалж болно. Холио солио гээд чөлөөт худалдаа ч зохион байгуулж болох юм.Би өмнө нь менежмент хийж байсан оффисийн барилга дээрээ Донор өдөрлөгийг зохион байгуулж байлаа, бараг 100-аад залуучууд нэг дор цугларан цусаа хандивлаж байсан юм. Нийгэмдээ ч тухайн цусаа хандивласан хүндээ мөн тустай ажил болж байлаа. Үйлчилгээ үзүүлж байгаа менежментийн компани маш санаачлагатай, мэдрэмжтэй, зохион байгуулалт сайтай ажиллах шаардлагатай.  Гол нь тухайн ажил нь аль нэг даргын сэтгэл хөдлөлөөр ганц хоёр удаа хийгээд орхиж болохгүй, тасралтгүй үргэлжилж, хөгжиж байх ёстой юм. Японы хөрөнгийн менежментийн компаний зөвлөснөөр барилга ашиглаж байгаа хүн бүрийг Хөрөнгийн менежментийн компани л халамжилдаг, ажиллах орчныг бүрдүүлдэг, сэтгэл ханамжийг өндөрт байлгаж, бизнесийн үйл ажиллагааг дэмжихээс гадна дундын соёлд сургаж хүмүүжүүлдэг байх ёстой гэж сургасан байдаг. 

-Бидний яриа орон сууцны үйлчилгээний талаар үнэхээр сайхан өрнөлөө. Дараагийн удаад оффисийн менежментийн талаар дэлгэрэнгүй ярилцъя.

Тэгэлгүй яахав. Баярлалаа. Бидний зүгээс мэддэг бүхнээ түгээн дэлгэрүүлж эх орноо иүү сайхан хөгжихийн төлөө эрхэм зорилготой. Тиймээс энэ сэдэв бол мөнхийн яриа. Дараа эргэн уулзья.

 

Холбоос: www.facebook.com/Ayasgal.uyanga/

ikon.mn сайтын Редакцын бодлогын 6.1; 6.2; 6.3 –т дурдсан үндэслэлээр сэтгэгдэл бичих талбарыг хаасан болно.