Өдөр ирэх тутам унан доройтож байгааг нь мэдэрсээр байгаа ч тэр бүр хөндөж, сайжруулах талаар огт анхаардаггүй, эсвэл хүсдэггүй шахам болсон монгол хүний ёс суртахуун, зан авирыг шүүмжлүүлэн байн ярьдаг цөөн хүний нэг нь Философийн ухааны доктор, либертари үзлийн Монгол дахь томоохон төлөөлөгч Б.Батчулуун.
Товчхондоо өөрөө өөрийгөө дааж, хэнд ч төвөг удаж, тээг бололгүй амьдрах үзлийг ярьдаг тэрбээр энэ цаг үеийг “Ёс суртахууны цасан нуранги” хэмээн тодорхойлжээ.
Аливааг бодитоор хардаггүй, муу хэлүүлэхээс айсандаа дүр эсгэдэг буюу үнэн төрхөө илчилдэггүй, бодож санаснаа нээлттэй хэлдэггүй, танил тал хөөж, нутгархах, хэн нэгнээс хамааралтай байх буюу бусдад найдах, өөрөө өөртөө эзэн болж чаддаггүйгээр зогсохгүй худлаа ярьдаг зэрэг монголчуудын дунд хавтгайрсан хамгийн дутагдалтай чанаруудыг тэрбээр задлан шинжилж, “Монголчуудын олиггүй араншигаас” номоо уншигчдад хүргэж байна.
Өдгөө монгол хүн ёс суртахуун гэдгийг мэдэхээ больсон учраас шүүгчид нь хүртэл гэмт хэрэгт холбогдох болж, дээр доргүй эс өгснийг авах(хулгайлах) эрдэмд нэвт суралцсаныг гээд маш олон асуудлыг шүүмжилжээ.
“Монголчуудын олиггүй араншингууд” номоос зарим эшлэлийг хүргэе.