Монголын үндэсний бөхийн холбооноос цувралаар цөөн тооны бөх оролцсон барилдаан зохион байгуулахаар төлөвлөжээ. Энэ хүрээнд "Хийморь" төслийг хэрэгжүүлж, улсын харцага цолтой найман бөхийн барилдааныг энэ сарын 14-нд зохион байгуулах юм байна.
Уг барилдаанд оролцох бөхчүүд сэргээшийн шинжилгээ өгөх хүсэлтээ Монголын үндэсний бөхийн холбоо/МҮБХ/-нд өнөөдөр хүргүүллээ. Энэхүү хүсэлтийг МҮБХ-ноос Биеийн тамир спортын улсын хороо, Допингийн эсрэг үндэсний төвд уламжилснаар шийдвэрлэх аж.
"Хийморь" төслийн хүрээнд зохион байгуулж буй реалити шоунд улсын харцага А.Цацавшир, Т.Бэгзсүрэн, Ц.Одбаяр, Х.Гантулга, О.Хангай, Д.Бат-Эрдэнэ, Т.Баасанхүү, Д.Анар нар оролцож байна.