Төгрөгийн хадгаламж ₮2.8 их наяд, валютынх ₮1 их наядаар өслөө

гэрэл зургийг MPA.mn

Mөнгөний нийлүүлэлт (M2) 2021 оны нэгдүгээр сарын эцэст 24.2 их наяд төгрөг болж, өмнөх оны мөн үеэс 3.6 (17.7%) их наяд төгрөгөөр өссөн болохыг Үндэсний статистикийн хорооноос нийгэм, эдийн засгийн мэдээллийг хүргэхдээ онцоллоо.  Ийнхүү өсөхөд, 

• Валютын хадгаламж нэг (28.9%) их наяд төгрөгөөр,
• Төгрөгийн хадгаламж 2.8 (25.6%) их наяд төгрөгөөр өссөн нь нөлөөлжээ.

Харин бага мөнгө (M1) 2021 оны нэгдүгээр сарын эцэст 3.9 их наяд төгрөг болж, өмнөх сараас 322.4 (7.7%) тэрбум төгрөгөөр буурч, өмнөх оны мөн үеэс 216.5 (5.9%) тэрбум төгрөгөөр өссөн байна. Бага мөнгөний задаргааг харвал,

• 3.1 (80.8%) их наяд төгрөг нь төгрөгийн харилцах,
• 0.7 (19.2%) их наяд төгрөг нь хадгаламжийн байгууллагаас гадуурх мөнгө байгаа аж. 

Түүнчлэн гүйлгээнд гаргасан бэлэн мөнгө нэгдүгээр сарын эцэст нэг их наяд төгрөг болж, өмнөх сараас 15.2 (1.5%) тэрбум төгрөгөөр, өмнөх оны мөн үеэс 168.9 (20.2%) тэрбум төгрөгөөр өссөн үзүүлэлттэй гарчээ. 

Нэгдүгээр сарын эцсээр валютын хадгаламж 4.6 их наяд төгрөг болж өмнөх оны мөн үеэс нэг (28.9%) их наяд төгрөгөөр өсөв

Төгрөгийн хадгаламж энэ оны нэгдүгээр сарын эцэст 13.6 их наяд төгрөг болж, өмнөх сараас 218.1 (1.6%) тэрбум төгрөгөөр, өмнөх оны мөн үеэс 2.8 (25.6%) их наяд төгрөгөөр өсжээ.

Төгрөгийн хадгаламжийг ангилан харвал: 

• 89.4 хувь (12.2 их наяд төгрөг) нь иргэдийн хадгаламж,
• 10.6 хувь (1.4 их наяд төгрөг) нь аж ахуйн нэгж, байгууллагын хадгаламж эзэлж байна. 

Харин валютын хадгаламж 4.6 их наяд төгрөг болж, өмнөх сараас 58.2 (1.3%) тэрбум төгрөгөөр буурч, өмнөх оны мөн үеэс нэг (28.9%) их наяд төгрөгөөр өсжээ.