Коронавирусийн халдвараар өвдсөн нэг өвчтөнд нийт 8,000,000 төгрөгийн өртөг зардал зарцуулж байгаа хэмээн Эрүүл мэндийн яамны хэлтсийн дарга Д.Нарангэрэл хэлэв.
Д.Нарангэрэл хэлэхдээ "Эмчилгээний зардлыг хоёр утгаар ойлгох хэрэгтэй. Бидний өмнө нь хэлж байсан 250-800 мянган төгрөг бол зөвхөн тухайн өвчтөнд зарцуулсан эмийн зардал юм.
Энэ эмийн зардал тухайн өвчтөний биеийн байдлаас шалтгаалж тус бүр өөр, өөр байна. Зарим өвчтөн 300 мянган төгрөгийн эм хэрэглэж байгаа бол зарим нь 800 мянган төгрөгийн эм хэрэглэж байгаа.
Харин 8,000,000 төгрөг бол нэг өвчтөнд зарцуулсан өртгийн тооцоолол. Үүнд, тухайн өвчтөнд хэрэглэсэн эмийн зардал, лабораторийн шинжилгээний урвалж оношлуурын зардал, тэнд ажиллаж байгаа хүмүүсийн хоол, ундны зардал ч багтаж байгаа юм.
Тухайлбал, нэг өвчтөнд дунджаар 4-5 удаа лабораторийн шинжилгээ хийхээс гадна нэг өвчтөнд эмчилгээ хийж буй эмч, сувилагч орох бүрдээ хамгаалах хувцас сольдог. Тэнд 4-5 хүний бүрэлдэхүүнтэй баг ажиллаж буй.
Энэ нь ерөнхийдөө эрүүл мэндийн байгууллагаас гарч буй нэг өвчтөнд зарцуулж буй өртгийн зардлын тооцоолол гэдгийг ойлгох хэрэгтэй" гэв.
ВИДЕО: