Г.Гийхнаран: Зөрүүтэй ойлголтоос үүдэн ЭМД-ын сангийн орлого 57.6 тэрбумаар тасраад байна

Дэлхий нийтэд тархаад буй коронавирусийн халдварын үед эдийн засгийг дэмжих хүрээнд Засгийн газраас иргэд болон ААН-үүдийг 2020 оны дөрөвдүгээр сарын 1-нээс аравдугаар сарын 1-нийг хүртэл Нийгмийн даатгал(НДШ) болон орлогын албан татвар(ХАОАТ)-аас чөлөөлөх шийдвэр гаргасан билээ. Гэтэл зарим ААН, иргэд уг шийдвэрт эрүүл мэндийн даатгал(ЭМД)-ыг мөн хамруулан буруу ойлгосноос үүдэн ЭМД-ын сангийн орлого тасалдаад байгаа ажээ.

Энэ талаар ЭМД-ын ерөнхий газрын Бодлогын хэрэгжилтийн газрын дарга Г.Гийхнарангаас тодруулахад "Коронавируст халдвар(СОVID-19)-ын цар тахлын үед иргэдийн эрүүл мэнд, орлогыг хамгаалах, ажлын байрыг хадгалах, эдийн засгийг идэвхжүүлэх багц арга хэмжээний тухай хуулийн хүрээнд тодорхой хугацаанд зөвхөн НДШ-ээс чөлөөлсөн. Үүнийг зарим ААН буруу ойлгосноос болоос ЭМД-ын шимтгэлээ төлөхгүй байгаа. Үүнээс үүдэн 2020 оны есдүгээр сарын 30-ны байдлаар ААН, даатгуулагчдаас орох шимтгэл 57.6 тэрбумаар тасраад байна. Есдүгээр сарын 30-ны байдлаар ЭМД-ын санд 380.4 тэрбум төгрөг орж ирэх ёстой байсан ч 322 тэрбум төгрөг төвлөрсөн. Тодруулбал,

• ААН-ээс орж ирэх 22 тэрбум,
• Даатгуулагчаас орж ирэх 25 тэрбум,
• Төсөвт байгууллагаас орж ирэх орлого 10.6 тэрбум төгрөгөөр тус тус тасарсан бол
• Төр даатгалыг нь хариуцдаг даатгуулагчид/0-18 насны хүүхэд, өндөр настан, цэргийн албан хаагч г.м/-ын шимтгэл бүрэн төлөгдсөн.

Монгол Улсын иргэн албан журмаар эрүүл мэндийн даатгалд хамрагдах ёстой" гэдгийг хэллээ.