Ипотекийн 6%-ийн зээлд 221 иргэн хамрагдаж, ₮15.8 тэрбумын санхүүжилт авжээ
Ипотекийн 6%-ийн зээлийн 2020 оны аравдугаар сарын 1-нээс олгож эхэлснээс хойш 22 хоногийн хугацаанд нийт 15.8 тэрбум төгрөгийн санхүүжилтийг 221 иргэнд олгожээ.
Үүнээс 9.9 тэрбум төгрөгийн эх үүсвэр бүхий 157 хүсэлтийг Монголбанкнаас, 5.9 тэрбум төгрөгийн 64 хүсэлтийг арилжааны банкууд тус тус биелүүлсэн талаар мэдээлэв.
Эндээс үзвэл Монголбанкнаас санхүүжүүлсэн зээлийн дундаж хэмжээ нэг зээлдэгчид 62 сая төгрөг байгаа бол арилжааны банкуудынх 92 сая төгрөг байна.
Ипотекийн 6%-ийн зээлийн хөтөлбөрт Монголбанк оролцож, жилд олгох нийт санхүүжилтийн 50%-ийг олгохоор болсон. Энэ хүрээнд Монголбанк жилд 300 тэрбум төгрөгийн санхүүжилтийг гаргах бол арилжааны банкууд мөн 300 тэрбум төгрөгийн зээл олгохоор болоод буй. Ингэснээр жилд 7,000 орчим иргэн тус зээлд хамрагдах боломжтой гэсэн тооцоо байна.
Орон сууцны хөнгөлөлттэй зээлд өнгөрсөн хугацаанд нийт 99 мянган хүн хамрагдаад байгаагаас 73 мянга нь 8%-ийн зээлтэй иргэд болох талаар Монголбанкны Нөөцийн удирдлага, санхүүгийн зах зээлийн газрын захирал А.Энхжин мэдээлж байв.
Ипотекийн зээлийн хүүг 8%-аас 6% болгож бууруулснаас өрхийн сарын орлого нь 900 мянган төгрөг хүрч буй иргэд хамрагдах боломж бүрдсэн. Үүнээс гадна сард төлөх дүн 20% буурч байгааг Монголбанк онцолж буй.
