FACT CHECK: 35-аас дээш настай иргэдэд ипотекийн 6%-ийн хүүтэй зээл олгохгүй -ХУДАЛ
Ипотекийн зургаан хувийн хүүтэй зээлийг 35-аас дээш насныханд олгохгүй байх тухай асуудал иргэдийн дунд төөрөгдөл үүсгээд байгаа билээ.
Иймд уг мэдээлэлд Fact Check хийж, бодит үнэн эсэхийг нь нягталсан байна.
Аравдугаар сарын 1-нээс олгож эхэлсэн ипотекийн зургаан хувийн хүүтэй зээлийг 35-аас дээш насныханд олгохгүй байх талаар Парламент суваг телевизийн аравдугаар сарын 19-ний мэдээний хөтөлбөрт дурджээ.
Энэхүү мэдээгээр зээл хүсэгчид тавих шаардлага дунд зээлийн гэрээ дуусгавар болох үед 65-аас дээшгүй настай байх гэж тусгасныг дурдаад энэ нь зээлдэгч 35-аас дээшгүй настай байна хэмээн мэдээлжээ.
Энэхүү мэдээг нягталж шалгахад худал гэдэг нь тогтоогдсон бөгөөд зээлтэй холбоотой журамд зээл авах насны хязгаарыг тусгаагүй байгааг дараах бичгийн эх сурвалжуудад дурдсан байна.
Мөн 2020 оны аравдугаар сарын 1-ний өдөр баталсан зургаан хувийн зээл олгохтой холбоотойгоор журамд оруулсан өөрчлөлтөд ч мөн л зээлдэгчийн насны хязгаарыг тогтоогоогүй байна.
Иймд ипотекийн зургаан хувийн зээлийг 35-аас дээш насныхан авах боломжгүй гэдэг нь иргэдийг төөрөгдүүлсэн, ташаа мэдээлэл юм.
Ц.Тамир (MCIR)
