Улаанбаатарыг хэн удирдах вэ?
Аймаг, нийслэл, сум, дүүргийн ИТХ-ын сонгууль өчигдөр болж өнгөрлөө. НИТХ-ын 45 төлөөлөгчийн 34 буюу 75.5 хувь нь МАН-аас сонгогдоод байна.
Энэ удаагийн сонгуульд МАН үнэмлэхүй ялалт байгуулсан тул дараагийн хотын даргыг томилох эрхтэй болсон.
Харин МАН-аас одоогоор "Хотын даргад нэр дэвшигчийг албан ёсоор тодруулаагүй" гэдгийг эх сурвалж хэлсэн юм.
Хотын дарга НИТХ-ын Төлөөлөгч байх шаардлагагүй талаар Засаг захиргаа, нутаг дэвсгэрийн нэгж түүний удирдлагын тухай хуульд заажээ. Төлөөлөгчдийн олонхын буюу 50-аас дээш хувийн санал авсан нэр дэвшигчийг томилуулахаар, томилох эрх бүхий албан тушаалтанд санал болгох талаар дурджээ.
Засаг даргад нэр дэвшигч нь дараах шаардлагыг хангасан байх талаар хуульд тусгасан байна.
- 26.5.1.дээд боловсролтой;
- 26.5.2.төрийн албанд 3-аас доошгүй жил ажилласан;
- 26.5.3.шүүхийн шийдвэрээр тогтоогдсон зээл, батлан даалтын болон бусад гэрээгээр хүлээсэн хугацаа хэтэрсэн өргүй байх;
- 26.5.4.шүүхийн шийдвэрээр тогтоогдсон татварын өр төлбөргүй байх;
- 26.5.5.ялгүй байх гэсэн шаардлага бий.
Нийслэлийн МАН-ын хорооны дарга болон МАН-ын даргын хооронд хотын даргын нэр яригдах нь гарцаагүй. Энэ тохиролцоон дээр үндэслэж дараагийн хотын дарга хэн байх вэ гэдэг нь тодорхой болох юм.
