Уншиж байна ...
Зураг
Зураг
ХУУЧИРСАН МЭДЭЭ: 2020/07/24-НД НИЙТЛЭГДСЭН

"Коронавируст халдварын хүндрэлээс сэргийлэхийн тулд Д витаминыг нэмэлтээр хэрэглэхийг судлаачид зөвлөж байна"

Г.Номин, iKon.mn
2020 оны 7 сарын 24
iKon.MN
Зураг зураг
Гэрэл зургийг Mpa.mn

Өнөөдрийн ээлжит хэвлэлийн хуралд ЭМЯ-ны Шинжлэх ухаан, технологийн нарийн бичгийн дарга Э.Оюунсүрэн оролцож, тоймыг танилцууллаа.

ДЭМБ-ын долдугаар сарын 20-ны мэдээлснээр коронавируст халдвартай холбоотой эрдэм шинжилгээ, судалгааны 48,168 ажил хийгджээ. Одоогийн байдлаар дэлхийн хэмжээнд эмнэл зүйн 2,405 туршилт судалгаа хийгдсэнээс 228 нь амжилттай хийгдсэн байна.

Дэлхий дахинаа хийгдэж буй зарим судалгааны ажлаас танилцуулъя:

  • Италийн эрдэмтэд витамин Д-г нэмэлтээр хэрэглэх нь ач тустай болохыг тогтоосон байна. 210 өвчтөний биеийн байдлыг цусан дахь витамин Д-ийн түвшинтэй харьцуулан судлахад, өвчтөний цусан дахь Д витамины хэмжээ бага байх нь халдварын хүндрэлийг илтгэх үзүүлэлт болохыг тогтоожээ. Тиймээс коронавируст халдварын хүндрэлээс сэргийлэхийн тулд Д витаминыг нэмэлтээр хэрэглэхийг судлаачид зөвлөж байна. Гэхдээ эмчийн зааваргүй дур мэдэн ихээр хэрэглэж, витамины хордлогод өртөхөөс урьдчилан сэргийлэхийг анхааруулжээ.
     
  • Мөн тус улсын эрдэмтэд коронавирусийн халдвар авсан 1,779 өвчтөнийг хамруулан мета-анализ судалгаа хийжээ. Судлаачид цусан дахь тромбоцитын хэмжээ бага буюу цус бүлэгнэх чадвар буурсан өвчтөнүүд хүндээр өвдөх, нас барах нь тромбоцитын хэмжээ хэвийн өвчтөнүүдтэй харьцуулахад төв дахин илүү байгааг тогтоосон байна. Иймд лабораторийн шинжилгээгээр тромбоцитын хэмжээ бага гэж гарсан өвчтөнүүдэд анхаарал хандуулах шаардлагатай гэсэн зөвлөмж гаргажээ.
     
  • АНУ-ын Нью-Йорк хотын эмнэлэгт коронавирусийн халдварын улмаас хэвтэн эмчлүүлсэн 3,334 өвчтөнийг хамруулан судасны бүлэнт тохиолдол нас баралтад хэрхэн нөлөөлж байгааг судалсан байна. Судасны бүлэн, уушгины бүлэн, бөглөгөр, гүний вений бүлэн, харвалт, зүрхний шигдээс үүссэн болон үүсээгүй нас барсан өвчтөнүүдийг харьцуулж үзэхэд, бүлэн үүссэн өвчтөнүүдийн нас баралт бүлэн үүсээгүй өвчтөнүүдийнхээс хоёр дахин өндөр байсныг тогтоожээ. Судасны бүлэн үүсэх нь коронавирусийн улмаас нас барах эрсдлийг 1.8 дахин нэмэгдүүлж байна хэмээн эрдэмтэд дүгнэсэн байна.
     
  • Франц улсын Фассери эмнэлэгт салхин цэцэгтэй төстэй уутанцартай улаан тууралт биеэр нь гарсан өвчтөнүүд хандсан байна. Шинжилгээгээр салхин цэцэг бус коронавирусийн халдвар авсан нь тогтоогджээ. Энэхүү тууралт нь загатнаагүй ба 10-22 хоногийн дотор сорвигүй эдгэрчээ. Судлаачид коронавирус арьсаар халдварлах боломжтой эсэх талаар цаашид дэлгэрэнгүй судлах шаардлагатай гэж үзэж байна.
     
  • Бразилын Сау-Пауло мужид цар тахлын улмаас тогтоосон хөл хорио хүрээлэн байгаа орчин, агаарын чанарт хэрхэн нөлөөлж байгааг судлахад, өмнөх таван жилийн дундажтай харьцуулахад азотын исэл 77.3 хувь, азоштын давхар исэл 54.3 хувь, угаарын хий 64.8 хувь хүртэл буурсан байна. Түүнчлэн агаарын бохирдол багассантай холбоотойгоор озоны давхарга 30 хувиар зузаарсныг эрдэмтэд мэдээлжээ.
     
  • Энэтхэг улсын судлаачид тус улсын хамгийн урт нуур болох Бембенад нууранд цар тахлын улмаас өөрчлөлт гарсан эсэхэд судалгаа хийсэн байна. Судалгаагаар тус нуурын усны бохирдлын хэмжээ хөл хорио тогтоохоос өмнөх үетэй харьцуулахад 16-34 хувиар буурсныг тогтоожээ.
     
  • Цар тахлын улмаас зарим төрлийн эмчийн үзлэгийг цахим хэлбэрээр явуулж байна. Франц улсад цахимаар эмчид үзүүлсэн 125 хүний дунд сэтгэл ханамжийн судалгаа явуулахад 87 хувь нь авсан үйлчилгээндээ, 76 хувь нь видео дуудлагын дуугаралт, 66 хувь нь видео дүрсний чанарт сэтгэл ханамжтай байгаагаа илэрхийлжээ.

Дотоодод хийгдэж байгаа судалгаануудаас танилцуулъя:

  • Монголд илэрсэн SARS, COVID хоёрын геномын бүтцийг тодорхойлж, молекул эпитемологийн онцлогийг тогтоон онош, тандалт, сэргийлэлтийн манай орны түвшинд тохирсон арга аргачлал бүхий зөвлөмж гаргах судалгааны ажлыг академич, шинжлэх ухааны доктор, профессор н.Нямдаваа ахлан явагдаж байна.
     
  • SARS, COVID хоёрын голомтлосон халдварын гномын судалгааг хийх төсөл дээр ХӨСҮТ, АШУҮИС хамтран ажиллаж байгаа.
     
  • Манай улсад бүртгэгдсэн шинэ коронавируст халдварын эмнэл зүйн судалгаа эхэлсэн.
     
  • ДЭМБ-ын санхүүжилттэй төслийн хүрээнд манай улс шинэ коронавируст халдварын эхний тохиолдлууд болон хавьтлуудыг судлах судалгааг эхлүүлсэн.
     
  • Мөн коронавиурст халдварын хүн амын насны бүлэгт суурилсан тархвар зүйн судалгааг ДЭМБ-ын судалгааны багтай хамтран хийж байна.

ВИДЕО:

https://www.facebook.com/iKonNews/videos/574481919891848
ikon.mn сайтын Редакцын бодлогын 6.1; 6.2; 6.3 –т дурдсан үндэслэлээр сэтгэгдэл бичих талбарыг хаасан болно.