Эрүүл мэндийн яамны хэвлэлийн хурлын дараа ХӨСҮТ-ийн Тандалт, судалгааны албаны дарга А.Амбасэлмаа сэтгүүлчдийн асуултад хариулав.
- Орхон аймагт сэжигтэй тохиолдол тусгаарлагдсан гэх мэдээлэл байна. Хариу нь хэзээ гарах вэ?
- Орхон аймагт тусгаарлагдсан хүмүүсийг сэжигтэй тохиолдол гэж үзэж байгаа бөгөөд өнөөдөр шинжилгээний хариу нь гарна. Ер нь сэжигтэй гэж тусгаарлагдсан хүмүүсээс шинжилгээ авахад хариу сөрөг гарч байгаа. Тухайн хүмүүс өөр ямар ч шалтгаанаар халуурсан байж болно.
- ОХУ-аас өмнө нь ирсэн оюутнууд эдгэрч дууссан уу?
- ОХУ-д Батлан хамгаалахын сургуульд сурч байгаад ирсэн хүүхдүүдийн ихэнх нь эдгэрсэн. Тэдгээр хүүхдүүдээс одоогоор хоёр нь л ХӨСҮТ-д эмчлэгдэж байгаа.
Мөн Алтанбулагийн боомтоор орж ирсэн хүмүүсээс 5-6 хүн л ХӨСҮТ-д байгаа бол бусад нь эдгэрсэн.
- Өнөөдөр шинээр илэрсэн таван тохиолдол хэдээс хэдэн насны хүмүүс вэ?
- Шинээр батлагдсан таван тохиолдлын хоёр нь насанд хүрсэн хүн, гурав нь 20-23 насны оюутан байна.
Мөн шинэ тохиолдлуудын нэг нь ОХУ-ын иргэн бөгөөд гэр бүлийн хүмүүсийг нь ойрын хавьтал гэж үзээд тусгаарласан.
ВИДЕО: