Герман улс Хонг Конгчуудын цагаачлалд тусгайлан дэмжлэг үзүүлэхгүйг Ангела Меркель мэдэгджээ

Европын Холбооны дээд зөвлөлийг Герман улс даргалж эхэлсэнтэй холбоотой хэвлэлийн хурлын үеэр тус улсын канцлерь Ангела Меркель Хятад улс болон Хонг Конгийн асуудлаар байр сууриа илэрхийлжээ.

Тэрбээр Хятад нь дэлхийд нөлөөтэй, тэр дундаа Европт онцгой нөлөөтэй улс тул хамтын ажиллагаагаа үргэлжлүүлэх ёстой гэж хэлсэн байна.

“Хүний эрх, нийгмийн асуудлууд, хөрөнгө оруулагчдыг хамгаалах, худалдаа, уур амьсгалын өөрчлөлт гээд олон асуудлаар бид Хятад улстай цаашид хамтран ажиллах шаардлагатай. Учир нь бид уур амьсгалын өөрчлөлтийг Хятадгүйгээр зогсоох боломжгүй” гэж Меркель мэдэгджээ.

Бээжингийн эрх баригчдын баталсан үндэсний аюулгүй байдлыг хангах шинэ хууль Хонг Конгт хэрэгжиж эхэлсэнтэй холбоотой, иргэдэд нь цагаачлах эрх олгох тухай асуултад хариулахдаа тэр “Герман улсад цагаачлах, оршин суух эрх бүх хүмүүст нээлттэй. Энэ тал дээр онцгойлон арга хэмжээ авах шаардлагагүй гэж бодож байна” гэж хэлсэн байна.

Одоогоор өрнөдийн орнуудаас Их Британи, Австрали улсууд Хонг Конгчуудын цагаачлалд онцгойлон анхаарал тавихаа мэдэгдээд байгаа юм.

Өчигдөр Хятадын гадаад хэргийн яам дээрх хоёр улсад хандаж “алдаатай шийдвэрээ залруулах”-ыг уриалсан байна.

Лхагва гарагт Их Британи улс тусгай паспорт эзэмшигч Хонг Конгийн иргэд гэрл бүл, насанд хүрээгүй хүүхдийн хамт тус улсад суурьших, цаашлаад иргэний харьяалал хүсэх боломжтойг зарласан юм. 

Австралийн ерөнхий сайд Скотт Моррисон мөн Хонг Конгийн нөхцөл байдалд санаа зовж байгаагаа илэрхийлээд иргэдэд нь цагаачлах тусгай эрх олгох асуудлыг судалж байгаагаа мэдэгдсэн байна.

Эх сурвалж: Reuters