"Хүнсний үйлдвэрлэл, захаас COVID-19 халдварын голомт гарч байгаа учир ЭМЯ-ны зөвлөмжийг дагахыг АНХААРУУЛЖ БАЙНА"
Дэлхийн дахинд хүнсний захтай холбоотой COVID-19-ийн голомт гарч байгааг ЭМЯ-ны хэлтсийн дарга Д.Нарангэрэл анхаарууллаа.
Видео:
Тэрбээр хэлэхдээ “Сүүлийн 14 хоногт дэлхий дахинд хүнсний үйлдвэрлэл, хүнсний захтай холбоотой коронавирусийн голомт гарч, дэгдэж байна.
Тухайлбал, өчигдөр гэхэд Их Британи улсын мах боловсруулах үйлдвэрийн 165 ажилтан халдвар авжээ.
Үүнтэй холбоотойгоор Эрүүл мэндийн яамнаас хүнс болон мах, махан бүтээгдэхүүний үйлдвэрлэл эрхлэгчдэд зориулсан зөвлөмж гаргасныг сайтар дагаж мөрдөхийг анхааруулж байна" гэсэн юм.
Дэлхийн дахинд бүртгэгдээд буй хүнсний зах, үйлдвэрээс гарсан голомтод халдварууд
Зургаадугаар сарын 26-ны байдлаар: БНХАУ-ын Шинфади хүнсний захын голомтоос 280 хүн халдвар авсан. Улмаар тус захаас худалдагдсан 8 тонн хүнсийг устгалд оруулжээ.
Зургаадугаар сарын 25-ны байдлаар: Германд шувууны аж ахуйн 35 ажилтанд коронавирусийн халдвар илэрсэн.
Зургаадугаар сарын 24-ний байдлаар: ХБНГУ-ын Умард Райн Вестфален муж улсын мах боловсруулах үйлдвэрийн 1,500 гаруй ажилчин коронавирусийн халдвар авсан.
Зургаадугаар сарын 22-ны байдлаар: АНУ-ын "Tyson Foods" компанийн АНУ дахь мах боловсруулах үйлдвэрт ажилладаг 693 ажилтан коронавирусийн халдвар авсан нь батлагдсан.
Мах боловсруулах үйлдвэрлэл, худалдаа эрхлэгчдэд өгөх зөвлөгөө
Аж ахуйн нэгжид:
- Биеийн халуун үзэх
- Ам, нүүрний хаалт зүүх
- Малгай, хормогч, бээлий өмсөх
- Хүн хооронд 1.5-2 метрийн зай барих
- Спиртэн суурьтай гар халдваргүйжүүлэгч байршуулах
- Агааржуулагч ажиллуулах, агаар сэлгэлт тогтмол хийх
- Махны мод, тавцан, хутга, хөрөө, махны машин зэргийг хэрэглэх бүртээ зориулалтын шингэнээр угааж цэвэрлэх
- Бохирдсон хормогч, ханцуйвчийг зориулалтын шингэнээр тогтмол угааж цэвэрлэх
- Сандал, хөргөгч, хаалганы бариул, хана, шал зэрэг хатуу гадаргууг 1л усанд 25мл белизна хийсэн уусмалаар өдөрт 2-оос доошгүй удаа халдваргүйжүүлэх
- Сард 1 удаа мэргэжлийн байгууллагаар халдваргүйжүүлэлт хийлгэх
- Халдвар судлагч, хүнсний технологич, эрүүл ахуйчийн бүрэлдэхүүнтэй багийг урьдчилан томилон, халдвар эсэргүүцэх төлөвлөгөөтэй байх
- Халдвар хамгааллын хяналт тавих хүн ажиллуулах
- Хог хаягдлыг ил задгай хаяхгүй байх
- Коронавируст халдвараас урьдчилан сэргийлэх зөвлөмжийг ил тод байршуулах
- Халуурах, ханиах, цээжээр өвдөх зэрэг шинж тэмдэг илэрвэл 119, 80086829 дугаарт хандах
Мах бэлтгэгч, худалдагч нарт:
- Ам, нүүрний хаалт зүүх
- Малгай, хормогч, бээлий өмсөх
- Хүн хооронд 1.5-2 метрийн зай барих
- Гараа сайтар савандаж угаах
- Нойтон сальфетка, спиртэн суурьтай гар халдваргүйжүүлэгчтэй байх
- Махны мод, хутга, ирлэгч зэргийг бусадтай сольж хэрэглэхгүй байх
- Бэлэн мөнгөөр аль болох тооцоо хийхгүй байх
- Бохир гараар ам, хамар, нүүрэндээ хүрэхгүй байх
- Ажлын хувцсаа тогтмол угааж, цэвэрлэх, хоорондоо солихгүй байх
- Ус, ундаа ам дамжуулан хэрэглэхгүй байх
- Ковид-19-ийн талаарх мэдээлэлтэй байх
Үйлчлүүлэгчдэд :
- Амны хаалт зүүх
- Маханд гар хүрэхгүй байх
- Бэлэн мөнгөөр аль болох тооцоо хийхгүй байх
- Тахиа, загасны махыг угааж хэрэглэх
- Далайн гаралтай бүтээгдэхүүн аль болох хэрэглэхгүй байх
- Сав,баглаа, боодлыг чийгтэй алчуур, нойтон сальфетикаар арчих
- Түүхий болон боловсруулсан бүтээгдэхүүнийг тус тусад нь байлгах
