Уншиж байна ...
Зураг
Зураг
ХУУЧИРСАН МЭДЭЭ: 2020/06/16-НД НИЙТЛЭГДСЭН

Япон улс зардал өндөртэй АНУ-ын пуужингаас хамгаалах системээс татгалзах болсноо зарлав

Р.Төмөр, ikon.mn
2020 оны 6 сарын 16
iKon.MN
Зураг зураг

Япон улс Умард Солонгосын пуужингийн довтолгооноос хамгаалах зориулалтаар АНУ­-д үйлдвэрлэсэн хоёр ширхэг Aegis Ashore системийг газар нутагтаа суурилуулахаар төлөвлөж байсан юм. Гэвч хоёр системийн нэгийг нь орон нутгийн иргэдэд аюулгүй байдлаар өөрчлөн суурилуулахад төсөөлж байснаас их зардал гарахаар байгаа тул төслийг бүхэлд нь зогсоож байгаагаа Японы батлан хамгаалах яам өчигдөр мэдэгджээ.

“Зардал, цаг хугацааг тооцоолж үзээд одоогийн төлөвлөгөөг хэрэгжүүлэх нь ямар ч логикгүй гэсэн дүгнэлтэд би хүрлээ” гэж батлан хамгаалахын сайд Коно Таро хэлсэн байна.

Япон улсын засгийн газар 2017 онд пуужингийн довтолгооноос хамгаалах хоёр шинэ системээр хүчээ зузаатгах шийдвэр гаргаж байв.

Хоёр системийн нэг нь өмнөд Ямагучи мужид, нөгөө нь умард Акита мужийн нутагт байрлаж, Япон улсын газар нутгийг бүхэлд нь хамгаалах ёстой байжээ.

Харин одоо ерөнхий сайд Абэ Шинзо улсынхаа пуужингийн довтолгооноос хамгаалах хөтөлбөрийг эргэн харах шаардлагатай болж байна.

Төсөл эхнээсээ бэрхшээлүүдтэй тулгарч байв. Тухайлбал нэг системийг нь суурилуулах газрыг дахин сонгохоор болсноос зардал нь огцом нэмэгдэж, хоёр системийг 30 жилийн хугацаанд ажиллуулах зардал 450 тэрбум иен ($4.1 тэрбум) хүрсэн байна. Мөн аюулгүй байдалдаа санаа зовсон нутгийн иргэдийн эсэргүүцэлтэй тулгарчээ.

Үүнээс гадна хоёр систем зөвхөн Япон улсын нутаг дэвсгэрийг Умард Солонгосын довтолгооноос хамгаалаад зогсохгүй, АНУ-ын нутаг дэвсгэр болох Гуам, Хавай арлуудыг хамгаалах болсон нь тус улсын үндсэн хуульд заасан зөвхөн өөрийгөө хамгаалах зарчмыг зөрчихөөр байв.

Өнөөдрийг хүртэл энэ төсөлд 180 тэрбум иен ($1.7 тэрбум) зарцуулаад байгаа нь бүгд салхинд хийсэхгүй, одоо ашиглагдаж байгаа хуучин системүүдэд зарим хэсгийг нь хэрэглэх боломжтойг Коно сайд мэдэгджээ.

АНУ нь өөрийн үйлдвэрлэсэн хуурай газрын Aegis Ashore пуужингаас хамгаалах системийг одоогоор Румын, Польш улсуудад суурилуулаад байгаа бөгөөд Япон улсад гурав дах системээ суурилуулах гэж байв.

 

Эх сурвалж: Associated Press