Covid-19 халдварын тоо ОХУ-д 300,000 шүргэж, Бразил улс дэлхийд гуравдугаарт жагслаа

ОХУ-ын ерөнхийлөгч Владимир Путин, Бразилын ерөнхийлөгч Жайр Болсонару нар

Мягмар гарагийн байдлаар ОХУ-д коронавирусийн батлагдсан халдварын тоо 299,941 хүрлээ. Сүүлийн 24 цагийн хугацаанд тус улсад 9,263 тохиолдол шинээр нэмэгджээ.

Тавдугаар сар гарсаар өдөрт нэмэгддэг халдварын тоо нь тогтмол 10,000-аас дээш байсан бол сүүлийн дөрвөн өдөр дараалан энэ босгыг даваагүй нь нааштай үзүүлэлт болж байна. Өнгөрсөн нэг хоногт Covid-19 өвчнөөр ОХУ-д 115 хүн амиа алдаж, нийт нас барсан өвчтөний тоо 2,837 хүрлээ.

Өмнөд Америк тивийн хамгийн том газар нутагтай, хамгийн их хүн амтай улс Бразилд өнөөдөр 13,140 тохиолдол шинээр нэмэгдэж, нийт халдварын тохиолдол нь 254,220 болжээ.

Ингэснээр тус улс Их Британийг халдварын тоогоор гүйцэж, дэлхийн улс орнуудаас зөвхөн АНУ, ОХУ-ын дараа гуравдугаарт жагсаж байна (Жон Хопкинсийн их сургуулийн гаргасан тооцоогоор).

Их Британийн батлагдсан халдварын тоо өнөөдрийн байдлаар 247,706 хүрээд байгаа юм.

Өнгөрсөн нэг хоногт Бразилд 674 хүн Covid-19 өвчнөөр нас барж, нийт амиа алдагсдын тоо нь 16,792 болжээ.

Эх сурвалж: Reuters, ТАСС