Евро стандартын хөдөлгөөнт хээрийн эмнэлэг

Онцгой байдлын байгууллагын II шатлалын хээрийн  хөдөлгөөнт эмнэлгийн иж бүрдэл нь  Монгол Улсын Засгийн газар, Польш Улсын Засгийн газар хоорондын хэлэлцээрийн хүрээнд  хэрэгжүүлсэн “Гал түймэртэй тэмцэх техник, тоног төхөөрөмжийг шинэчлэх төсөл”-ийн хүрээнд нийлүүлэгдсэн байна.

Гамшиг, ослын үед үүрэг гүйцэтгэх зориулалт бүхий 6.5 сая еврогийн өртөгтэй тус  хээрийн эмнэлэг нь нэг дор 65-100 хүн хүлээн хүчин чадалтай. Эрэмбэлэн ангилалт, дүрс оношлогоо, лаборатори, мэс засал, эмийн сан, цусны нөөцлүүр, дотрын тасаг, эрчимт эмчилгээ гэсэн хэсгүүдтэй цогц хөдөлгөөнт байгууламж юм.

Энэ сарын 06-08-ны өдрүүдэд зохион байгуулсан “Ковид-19″ цар тахлын үеийн харилцан ажиллагаа, хариу арга хэмжээ”  сэдэвт дадлага сургуулийн хүрээнд ОБЕГ-ын харьяа Давтан сургалт, сургалт сэргээн заслын төв-113 дугаар ангийг түшиглэн  тус хээрийн эмнэлгийг дэлгэх сургуулийг хийж, бэлтгэл бэлэн байдлыг хангасан гэж Онцгой байдлын ерөнхий газраас мэдээллээ.

Гэрэл зургийг ОБЕГ-аас авав.

Эх сурвалж: Онцгой Байдлын Ерөнхий Газар