Халим хочит толгойлогчтой хар тамхины мафийн бүлэглэлд элссэн Монголын консулын ажилтнууд...
Туркийн хэвлэлээр Монголын консулын ажилтнуудын элссэн гэгдээд буй Халим хочит толгойлогчтой хар тамхины мафийн сүлжээг хэрхэн илрүүлсэн тухай гарсан байна.
Энэ хэргийн талаар Туркийн Ерөнхий Прокурорын Монгол Улсад ирүүлсэн захидлын талаар өчигдөр iKon.mn мэдээлсэн.
Тэгвэл өнөөдөр бид TimeTurk сайтад гарсан гэмт хэргийн бүлэглэлийг хэрхэн илрүүлсэн баримтуудыг орчуулан хүргэж байна.
Тус улсын Хар тамхитай тэмцэх газрынхан ( 2018 оны арванхоёрдугаар сарын 17-нд анх мэдээлэл ирсний дагуу) Омер Фарук Билен, Зейтинбурн болон Ханэфи Арслан нарын иргэд нь хилийн чанадад амьдардаг Начи Йылмаз, Абдулла Алп, Устюн нараар дамжуулан Европ ба Истанбул, Бакыркёй хотын зах зээлд хар тамхи нийлүүлдэг болохыг тогтоосон байна.
Мөрдлөг шалгалтын явцад 25 хүнийг баривчилсан бөгөөд баривчилгааг мафийн гишүүн Фарук Билен, Ханефри Арслан нарын утасны яриаг чагнасны үндсэн дээр хийсэн. Тэдний яриа, холбоосууд гэмт хэргийн хамжигчдаа шууд зааж өгч байсан талаар ч энэ мэдээнд өгүүлжээ.
Баримт 1: Яллагдагч Атилла Өзжан 2019 оны 01 дүгээр сарын 13-нд 34 RL 6330 дугаарын автомашинаар гэрээсээ гарч яваад Олжай Күчүквардарын гэр болох Сарыер дэх тансаг эдлэнд очсон бөгөөд энд мөн баривчлагдсан байгаа Фатих Казанс, Себахаттин Сонян нартай уулзаад харьсныг Туркийн Хар тамхитай тэмцэх газар баталгаажуулжээ.
Баримт 2: Хар тамхитай тэмцэх газрынхан энэ өдөр 19:00 цагийн үед Олжай Күчүквардарын гэрт нэгжлэг хийж их хэмжээний героин, кокаин, экстазийн шахмал илрүүлж, хураан авчээ. Олжай Күчүквардарын гар утсыг шалгах үеэр хар тамхины бүлгийн өөр гишүүд болох Кит, Лоялсван гэх хүмүүсийн нэр олдсон бөгөөд энэ бүлэглэлд Ах, Hipsteel, Cerisetar зэрэг нэр хочтой төлөөлөгчид байдгийг олж илрүүлжээ.
(Харилцан мессежүүдээс Кэйт, Лоялсван, Аби, Хипстайл, Серистет, Хамблединго, Лимедоу зэрэг хочтой хүмүүстэй мансууруулах бодис наймаалцдаг байсан талаар олж илрүүлжээ)
Баримт 3: Үүний дараа тансаг шилтгээний камерт үлдсэн нэгдүгээр сарын 8, 10, 13-ны өдрүүдийн бичлэгүүдийг шалгахад нэгэн Ерөнхий консулын газрын харьяа 34 СС3221 авто машин нэгдүгээр сарын 10-ны өдөр Олжай Күчүквардар болон Атилла Өзжан нараас "Loyalswan", "Abi" гэсэн хочтой хүмүүсийн зааврын дагуу героин бүхий олон тооны боодол хар тамхийг ачин хилийн чанад руу гарсан бөгөөд нэгдүгээр сарын 13-нд Туркт эргэж ирэхдээ каннабис, олсны ургамал зэргийг ачиж ирснийг тогтоожээ.
Харин тэрхүү машин нь Монгол Улсын Ерөнхий консулын газрын нэр дээр бүртгэлтэй автомашин байж таарчээ.
Баримт 4: Баривчлагдсан гэмт хэрэгтнүүд олон улс дамнасан хар тамхины наймааны энэ бүлэглэлийг “Халим” хэмээх хочтой хүн байгуулсан гэж мэдүүлээд байгаа юм байна. Хэд хэдэн удаагийн нэгжлэгээр энэ бүлгийнхнээс 6,874 кг героин, 750 мянга орчим ширхэг шахмал экстази, их хэмжээний олсны ургамал, 103 кг кокаин хураан авснаа Туркийн Прокурорын байгууллага зарлажээ.
Баримт 5: Гэмт хэргийн бүлгийнхэн хар тамхиа хил давуулан тээвэрлэхдээ Монгол Улсын Ерөнхий консулын газрын эзэмшлийн 34 СС3221 ба 34 СС 2542 дугаартай, автомашиныг ашигладаг байсан ба энэ автомашин хилийн чанадаас кокаин, шахмал экстазиг авчирч, буцаан хил давуулах ажлыг эрхэлдэг байсныг тогтоожээ. Мансууруулах бодисыг хил давууулах, тансаг шилтгээн, томоохон худалдааны төвүүдэд хүргэх ажлыг Монгол Улсын дипломат паспорттой Б.Энхмөнх, Б.Алтансүх болон С.Б нар гүйцэтгэж байсан талаар мэдээнд өгүүлсэн байна.
Туркийн прокурорууд Хар тамхи зохион байгуулалттай худалдсан гэмт хэрэгтнүүдэд дээд тал нь 150 жилийн ял оноохоор төлөвлөсөн бөгөөд энэ хэрэгт Туркийн гаалийн байцаагчид хүртэл оролцсон байна.
Эх сурвалж: TimeTurk
