ОХУ-д оношлогдсон коронавирусийн халдвар тээгчдийн 20 гаруй хувиас ямар нэг шинж тэмдэг илрээгүй байна

ОХУ-д бүртгэгдсэн коронавирусийн халдварын тохиолдлуудын 20 гаруй хувиас нь ямар нэг шинж тэмдэг илрээгүй бол 14 хувь нь хүнд хэлбэрээр өвчилснийг тус улсын хэрэглэгчийн эрх ашгийг хамгаалах газрын дарга Анна Попова өчигдөр сэтгүүлчдэд мэдэгджээ.

“Өнөөдрийн байдлаар бидний оношилсон нийт өвчтөнүүдийн нэлээд хэсгээс ямар нэг шинж тэмдэг илрэхгүй байна. Тодруулбал халдвартай нь тогтоогдсон нийт хүмүүсийн 20 гаруй хувиас өвчний ямар ч шинж тэмдэг илрэхгүй байгаа бол зөвхөн 14 хувиас нь халуурах, ханиалгах, амьсгал боогдох зэрэг шинжүүд хурц хэлбэрээр илэрч байна” гэж тэр мэдэгдсэн юм.

Лхагва гарагийн байдлаар ОХУ-ын 75 бүс нутагт нийт 2,777 халдварын тохиолдол бүртгэгджээ. Сүүлийн 24 цагийн хугацаанд 440 шинэ тохиолдол илэрсэн байна.

Өнгөрсөн хугацаанд тэдгээрээс 24 нь нас барж, 190 нь бүрэн эдгэрчээ.

Өчигдөр илэрсэн халдварын тохиолдлуудын хамгийн олон буюу 267 нь Москва хот орчимд бүртгэгдсэн байна.

Эх сурвалж: ТАСС