Уншиж байна ...
ХУУЧИРСАН МЭДЭЭ: 2020/03/30-НД НИЙТЛЭГДСЭН

Covid-19 өвчнөөр АНУ-д 200,000 хүртэл тооны хүн нас барах магадлалтайг мэргэжилтэн анхааруулжээ

Э.Сэмүүн, ikon.mn
2020 оны 3 сарын 30
iKon.MN
Зураг зураг
Доктор Фаучи Цагаан ордонд болсон хэвлэлийн хурлын үеэр

Коронавирусийн халдвараар АНУ-д 200,000 хүртэл тооны хүн нас барах магадлалтай байгааг тус улсын анагаах ухааны тэргүүлэх мэргэжилтэн өчигдөр анхааруулжээ.

Харшил, Халдварт Өвчин Судлалын Үндэсний Хүрээлэнгийн захирал, доктор Энтони Фаучи өчигдөр CNN сувагт ярихдаа тахлын эндэгдлийн тоо 100,000-аас 200,000-ын хооронд хүрэх магадлалтайг хэлсэн байна.

Албан ёсны тоо баримтаас үзвэл 2010 оноос хойш АНУ-д ханиад томууны улмаас жил бүр 12,000-61,000 хүн нас барж байжээ. 1918-1919 онд гарсан томууны дэгдэлтийн үед тус улсад нийт 675,000 хүн нас барж байв.

Ням гарагийн байдлаар АНУ-д шинэ коронавирусийн өвчлөлөөр нас барсан хүний тоо 2,400 хүрсэн нь хоёр хоногийн өмнөхөөс хоёр дахин өссөн үзүүлэлт байжээ. Дэлхий даяар эндэгдлийн тоо 33,000 гараад байгаа юм.

Өчигдрийн байдлаар АНУ-д бүртгэгдсэн халдварын тоо 137,000 хүрсэн нь дэлхийн улс орнууд дотроос хамгийн муу үзүүлэлт болоод байна.

АНУ-ын тахлын хамгийн том голомт болоод байгаа Нью Йорк мужид Ням гарагийн байдлаар 60,000 орчим халдварын тохиолдол бүртгэгдэж, 965 өвчтөн нас баржээ.

Сүүлийн 24 цагийн хугацаанд тус мужид өдөрт нас барсан хүний тоо 237-оор нэмэгдсэн нь зургаан минут тутамд нэг хүн нас барсан үзүүлэлт болж байна.

Тахал хүндэрсэн мужуудад оношлуур болон уушиг орлуулагч аппарат дутагдалтай байгааг албаныхан мэдэгдэж, холбооны засаг захиргаанаас хангахыг шаардсаар байгаа юм. Цагаан ордон хангамжийг удахгүй нэмэгдүүлэхээ өдөр бүр амлаж байгаа ч үр дүн гараагүй байна.

 

Эх сурвалж: Associated Press