Уншиж байна ...
ХУУЧИРСАН МЭДЭЭ: 2020/03/29-НД НИЙТЛЭГДСЭН

Дональд Трамп коронавирусийн тахлын голомт Нью Йорк мужийг гадаад ертөнцөөс таслах санал гаргажээ

Э.Сэмүүн, ikon.mn
2020 оны 3 сарын 29
iKon.MN
Зураг зураг

АНУ-ын ерөнхийлөгч Дональд Трамп өчигдөр тус улсын коронавирусийн тахлын хамгийн том төв болоод байгаа Нью Йорк мужийн орох, гарах урсгалыг хэсэг хугацаанд бүрэн хаах санал гаргажээ.

Өнөөдрийн байдлаар тус улсад амиа алдсан хүний тоо 2,000 давсан нь гурван өдрийн дотор хоёр дахин өссөн үзүүлэлт юм. Мөн халдварын тохиолдлын нийт тоо нь 120,000 давж, дэлхийд хамгийн муу үзүүлэлт болоод байна.

Нью Йорк мужийг бүхэлд нь, зэргэлдээ Нью Жерси, Коннектикут мужуудыг хэсэгчлэн “цоожлох” арга хэмжээ авснаар коронавирусийн халдвар бусад мужуудад тархах боломжийг хаана гэж Трамп үзэж байна.

“Нью Йоркоос Флорида руу тархаж байгаа гэсэн мэдээлэл байна. Маш олон Нью Йоркчууд бусад мужууд руу зорчиж байна. Үүнийг бид зогсоох ёстой” гэж Трамп сэтгүүлчидтэй уулзахдаа хэлжээ.

Харин Нью Йорк мужийн захирагч Эндрью Куомо энэ санааг хүчтэй эсэргүүцэж байгаагаа илэрхийлсэн байна.

Тэрээр Трампын санааг үр ашиггүй, Америкийн үнэт зүйлсийн эсрэг, эмх замбараагүй байдал үүсгэх зүйл гэж CNN сувагт ярьжээ.

Мөн аль нэг мужид ийм хатуу арга хэмжээ авах хууль эрх зүйн чадамж АНУ-ын ерөнхийлөгчид байгаа эсэхэд эргэлзэж байгаагаа ярьсан байна.

Трамп өмнө нь АНУ-ын эдийн засгийг дөрөвдүгээр сарын дундаас эхлэн хэвийн горимд шилжүүлэх санаа ярьж байсан юм. Харин өчигдөр ярихдаа тэр “Тухайн үеийн нөхцөл байдлыг харж байж шийднэ” гэж хэлсэн байна.

Нью Йорк орчмын бүс нутаг нь АНУ-ын зүүн эргийн эдийн засгийн гол хөдөлгүүр, хүн амын 10 хувь, үндэсний дотоодын нийт бүтээгдэхүүний 12 хувийг бүрдүүлдэг.

Хятад улс Ухань хотын орох, гарах урсгалыг бүрэн хаасны үр дүнд коронавирусийн тахлыг зогсоосон түүхтэй.

АНУ-ын зарим мужууд Нью Йоркоос ирсэн зорчигчдыг тусгаарлах арга хэмжээ авдаг болоод байгаа.

 

Эх сурвалж: Reuters