Уншиж байна ...
Зураг
Зураг
ХУУЧИРСАН МЭДЭЭ: 2020/03/21-НД НИЙТЛЭГДСЭН

Италид коронавирусийн тахал дэгдсэнээс хойш нэг өдрийн дотор хамгийн олон хүн нас барлаа

Р.Төмөр, ikon.mn
2020 оны 3 сарын 21
iKon.MN
Зураг зураг

Пүрэв гарагт Итали улсад шинэ коронавирусийн өвчлөлөөр 627 хүн нас барж, нийт эндэгдлийн тоог 4,032 болгосон тухай тус улсын албаныхан өчигдөр мэдээлжээ.

Энэ нь сар орчмын өмнө Италид халдварын анхны тохиолдол бүртгэгдсэнээс хойшх хамгийн өндөр өсөлт болсон байна.

Нийт илэрсэн халдварын тохиолдлын тоо 47,021 болж, өмнөх өдрийн 41,035-аас 14.6 хувиар өсчээ.

Өчигдөр Италийн үндэсний эрүүл мэндийн хүрээлэн тус улсад дэгдсэн Covid-19 тахлын талаар анхны дэлгэрэнгүй тоо баримтыг танилцуулсан юм. Уг тоо баримтаас үзвэл коронавирусийн өвчлөлөөр нас барсан хүмүүсийн дундаж нас Италид 78.5 байна.

Хамгийн залуу нь 31 настай бол хамгийн ахмад нь 103 настай байжээ. Тэдний голч нас нь 80 байна.

Нас барагсдын 41 хувь нь 80-89 насныхан, 35 хувь нь 70-79 насныхан байжээ.

Итали улс нь өндөр настнуудын хүн амд эзлэх хувь хэмжээгээр дэлхийд зөвхөн Японы дараа бичигддэг. Нийт хүн амын 23 хувь нь 65-аас дээш насныхан байдаг байна.

Нас барсан 3,200 өвчтөний 70.6 хувь нь эрчүүд байсан бол 29.4 хувь нь эмэгтэйчүүд байжээ. Нас барсан эрчүүдийн голч нас 79 бол эмэгтэйчүүдийнх 82 байна.

Харьцуулбал Италид коронавирусийн халдвартай нь тогтоогдсон нийт өвчтөнүүдийн голч нас 63 байжээ.

Нас барсан 481 өвчтөний эрүүл мэндийн нөхцөл байдлыг гүнзгийрүүлж судлахад тэдний 99 хувь нь ямар нэг архаг хууч өвчтэй хүмүүс байжээ. 48.6 хувь нь гурав ба түүнээс дээш тооны суурь өвчтэй байсан байна.

Тэдгээрийн 73.8 хувь нь цусны даралт өндөр, 34 хувь нь чихрийн шижинтэй, 30.1 хувь нь зүрхний өвчтэй хүмүүс байжээ.

Анх эмнэлэгт хэвтэхдээ халдвартай хүмүүсийн 76 хувь нь өндөр халуунтай, 73 хувь нь амьсгалахад бэрхшээлтэй байсан бол 40 хувь нь ханиалгах, 8 хувь нь суулгах зовиуртай байсан байна.

Нас барсан 3,200 өвчтөнөөс дөнгөж ес нь 40 хүртэл насныхан байсны нэгээс бусад нь эрэгтэйчүүд байжээ.

 

Эх сурвалж: Reuters

 

ikon.mn сайтын Редакцын бодлогын 6.1; 6.2; 6.3 –т дурдсан үндэслэлээр сэтгэгдэл бичих талбарыг хаасан болно.