Хятадын аж үйлдвэрийн бүтээмж эхний хоёр сард 13.5 хувиар унажээ

Хятадын статистикийн үндэсний хороо өнөөдөр оны эхний хоёр сарын эдийн засгийн тоон үзүүлэлтүүдийг танилцуулжээ.

Энэ хугацаанд шинэ коронавирусийн дэгдэлтийн улмаас тус улсын эдийн засагт огцом уналт гарсан байна. 

Тухайлбал аж үйлдвэрийн бүтээмж 13.5 хувийн уналттай гарсан нь анхны төсөөлж байсан 3 хувийн уналтаас хол хэтэрсэн үзүүлэлт болжээ.

Covid-19 вирусийн дэгдэлтийг зогсоох зорилгоор олон сая хүнийг хөл хорионд оруулж, үйлдвэрүүдийн ажиллагааг зогсоосны үр дүн ингэж гарсан байна.

Өөр нэг чухал үзүүлэлт болох жижиглэн худалдааны хэмжээ өнгөрсөн хоёр сард 20.5 хувиар унасан нь мөн түүхэн доод үзүүлэлт болжээ. Блүүмбэргийн шинжээчид энэ уналтыг 4 хувь орчим байна гэж тооцоолж байв.

Гэхдээ Хятадын засгийн газар коронавирусийн дэгдэлт намжиж, амьдрал хэвийн горимд шилжиж эхэлсэн тул эдийн засаг буцаад сэргэнэ гэдэгт итгэлтэй байна.

Өнгөрсөн долоо хоногийн байдлаар тахлын төв болсон Хубэй мужаас гадна орших том компаниудын 95 хувь нь үйл ажиллагаагаа сэргээсэн тухай албаныхан мэдээлжээ.

Хятадын статистикийн үндэсний хорооны хэвлэлийн төлөөлөгч Мао Шэнёнь уналтын гол шалтгаан коронавирусийн тахал байсан гээд сөрөг нөлөө нь богино хугацааны, зохицуулах боломжтой хүчин зүйл гэж мэдэгдсэн байна.

Энэ оны эхний улирлын үр дүн гуравдугаар сарын үзүүлэлтээс хамаарах гэнэ. Мао Шэнёний хэлж байгаагаар улирлын эдийн засгийн үзүүлэлтийн 40 хувь нь гуравдугаар сар, 60 хувь нь өмнөх хоёр сарын үзүүлэлтээс хамаардаг ажээ.

Хятад улс коронавирусийн гамшигт түрүүлж нэрвэгдээд одоо гарах замдаа орж байгаа бол дэлхийн бусад улс орнуудад хямрал дөнгөж эхэлж байгаа юм.

Тиймээс Хятадын эдийн засагт үзүүлсэн сөрөг нөлөө нь бусад улс орнуудын хувьд ирээдүйгээ төсөөлөх чиг баримжаа болно гэж шинжээчид үзэж байна.

Эх сурвалж: South China Morning Post