Налайхын нэг иргэн онгоцноос буугаад зугтаах гэсэн бол тусгаарлагдсан зарим иргэн жагсаал хийх, архи уух гэж оролджээ
Эрүүл мэндийн яамнаас COVID-19 халдвартай холбоотой ээлжит мэдээллээ өнөөдөр хийлээ.
Энэ үеэр иргэдийг тусгаарлахад гарч буй зөрчлийн талаар ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан мэдээлэл өглөө.
Тэрбээр "COVID-19 халдвар нь дэлхий нийтийг цочроосон, хүнд хэлбэрийн өвчин байгааг нийт ард түмэн мэдэж байгаа. Засгийн газар, УОК-ийн шийдвэрээр гуравдугаар сарын 3-ныг хүртэлх хугацаанд Монгол Улсын бүх нутаг дэвсгэрт онцгой дэглэм тогтооход орон нутгийн засаг захиргаа шуурхай ажиллаж, ард түмэн ухамсартай байсан явдалд баярласнаа хэлье.
Цагдаагийн байгууллага олон нийтийн аюулгүй байдлыг хангах хуулиар хүлээсэн чиг үүрэгтэй. Үүний хүрээнд ажиллаж байна. Төр засгаас авч хэрэгжүүлж буй ажилд зарим иргэний хариуцлагагүй, хууль тогтоомжоо сахиж хэрэгжүүлдэггүй байдлаас болж зөрчлүүд гарч байна. Тухайлбал, тусгаарлагдаж байгаа иргэдийн дундаас зөрчил гаргаж байна.
- "Бага баян" амралтад тусгаарлагдсан Хөвсгөл аймгийн харьяат иргэн Б "Би эмнэлгийн ажилтан. Бүгдээрээ эндээс гарья" хэмээн бусдыгаа буруу зүйлд уриалан дуудаж, жагсаал маягийн юм хийх гэж оролдсон.
- Цэргийн төв эмнэлэгт тусгаарлагдаж байгаа нэг иргэн ачаа тээшиндээ авч ирсэн согтууруулах ундааг уух гэж оролдсон. Бусдад саванд хийж тараах гэж оролдсон ба зарим өрөөний хаалга үүдийг татсан зөрчил гаргасан.
- ХӨСҮТ-д тусгаарлагдсан иргэдээс гаръя гэж дураараа авирласан.
- Налайхын нэг хүн онгоцноос буугаад зугтаах гэсэн.
ЗАЛРУУЛГА
Эрүүл мэндийн яамнаас өнөөдөр /2020.03.05/ танилцуулсан мэдээллийн үеэр цагдаагийн байгууллагаас мэдээлэл хийх үедээ Улсын 2 дугаар эмнэлэгт тусгаарлагдсан иргэд архи, согтууруулах ундааг хэрэглэж зөрчил гаргасан гэх ташаа мэдээлэлдээ хүлцэл өчиж байна.
Энэхүү зөрчил нь цэргийн төв эмнэлэгт үүссэн болно.
Цагдаагийн ерөнхий газар
Зөрчил гаргасан иргэдэд Эрүүгийн болон Зөрчлийн хуулиар хариуцлага тооцно
Монгол Улс хэдийгээр олон талын эрх чөлөөтэй орон боловч хүний амь нас, эрүүл мэндийн төлөө тавигдаж буй шаардлагыг ёсчлон биелүүлэх нь иргэн бүрийн хатуу үүрэг. Энэ үүргээ биелүүлээгүй хүнтэй хариуцлага тооцно. Эрүүгийн хууль, зөрчлийн хуулиар арга хэмжээнүүдийг авна.
Бид гаргаж байгаа зөрчлүүдийг баримтжуулах ажлыг явуулж байгаа. Дэглэмийн тодорхой хугацаа дуусаад шинжилгээ нь сөрөг гарсан үед бүгдтэй нь хатуу хариуцлага тооцно гэдгийг анхааруулж байна. Гаргаж байгаа зөрчил болгон дээр хариуцлага ирнэ шүү. Энэ үйлдлүүдээ таслан зогсоохгүй ямар нэгэн байдлаар эсэргүүцээд байгаа хүмүүсийг хэвлэл мэдээллийн хэрэгслээр олон нийтэд зарлана" гэв.
