АНУ жирэмсэн эмэгтэйчүүдэд виз олгох журмаа чангатгахаар бэлдэж байна

Трампын засаг захиргаа визний журамдаа өөрчлөлт оруулж, хөл хүнд эмэгтэйчүүдэд жуулчны виз олгох нөхцлийг чангатгахаар бэлдэж байгаа тухай Вашингтоны албаны эх сурвалж мэдээлжээ.

Өөрөөр хэлбэл жирэмсэн эмэгтэйчүүд виз хүсэхдээ АНУ-д зорчих болсон илүү үндэслэлтэй шалтгаан гаргах ёстой болох гэнэ.

АНУ-ын үндсэн хуульд тус улсад төрсөн бүх хүнийг иргэнээ болгох заалт байдаг. Энэ нь гадаад улсын иргэн эмэгтэйчүүдэд хүүхдээ АНУ-д төрүүлснээр АНУ-ын иргэн болгох боломж олгодог байна.

Трампын засаг захиргаа энэ боломжийг хаах тухай өмнө нь мэдэгдэж байсан ч хэрхэн хэрэгжүүлэх арга нь тодорхойгүй байв. Тухайлбал консулын ажилтан виз хүсэгч эмэгтэй жирэмсэн эсэх, хүүхдээ АНУ-д төрүүлэх төлөвлөгөөтэй байгааг нь хэрхэн мэдэх зэрэг асуудлууд тодорхойгүй байна.

“Хүүхэд төрүүлэх аялал” нь АНУ-д болон гадаадад ашигтай бизнест тооцогддог. Америкийн зарим компаниуд $80,000 хүртэл төлбөрөөр гадаадын иргэн эмэгтэйчүүдийг АНУ-д ирүүлж, хүүхдийг нь төрүүлэх үйлчилгээ үзүүлдэг байна.

Энэ боломжийг хамгийн их ашигладаг нь Хятад, Оросын иргэд юм. Вашингтоны засаг захиргаа ийм үйл ажиллагаа явуулдаг компаниудтай Трампыг ерөнхийлөгч болохоос өмнө ч тэмцэж байжээ.

Хэдэн эмэгтэй АНУ-д ирээд хүүхэд төрүүлсэн талаар албан ёсны тоо баримт байхгүй. Цагаачлалын бодлогыг чангатгах зорилготой ажилладаг “The Centre for Immigration Studies” байгууллагаас 2012 онд гаргасан тоогоор нийт 36,000 эмэгтэй тус улсад жуулчлалын шугамаар ирж, хүүхэд төрүүлээд буцсан байна.

Визний шинэ журмын төслийг өнөөдөр АНУ-ын төрийн департмент олон нийтэд танилцуулах ажээ.

Эх сурвалж: Associated Press