Энэ сарын 16-ны өдөр Африкийн Кени улсад хуралд оролцоод ирсэн манай улсын 19 төлөөлөгчийг тусгаарлаж, шинжилгээ авч буй талаар бид өмнө нь мэдээлсэн.
Тодруулбал, Найроби хотод энэ сарын 11-14-ний хооронд зохион байгуулагдсан НҮБ-ын Хүн амын сангийн Олон улсын уулзалтад оролцсон манай улсын 20 төлөөлөгчийн нэг холер өвчнөөр өвчилж тухайн улсын эмнэлэгт хэвтэн эмчлүүлэхээр болсон.
Харин энэ сарын 16-ны өдөр эх орондоо ирсэн бусад төлөөлөгчийг ХӨСҮТ-д тусгаарлан, тандалт судалгаа, лабораторийн шинжилгээг хийж байгаа юм.
ЭМЯ-ны Нийгмийн эрүүл мэндийн газрын дарга Д.Нарангэрэлээс тусгаарлагдсан төлөөлөгчдийн шинжилгээний хариу гарсан эсэхийг тодруулахад "Төлөөлөгчдийн эхний зургаан цагийн шинжилгээний хариу сөрөг буюу эрүүл гарсан. Гэхдээ 72 цагийн дараа давтан шинжилгээ авсан бөгөөд хариу нь удахгүй гарна.
Тус шинжилгээний хариуг харгалзан төлөөлөгчдийн тусгаарлалтыг болих эсэхээ шийднэ" гэлээ.
Иймд ард иргэдийг холeр өвчний голомттой улс оронд зорчихгүй байхыг ЭМЯ-наас анхааруулаад байгаа билээ.