Залуу уран бүтээлч Г.Гэрэлхүүгийн “Чөтгөрийн өндөг” бие даасан үзэсгэлэн 10 дугаар сарын 6-ныг дуустал Art Space 976-д үргэлжилнэ.
Энэхүү үзэсгэлэн зохион байгуулагдаж байгаатай холбогдуулан “Чөтгөрийн өндөгний тухай ярилцъя” нэртэй хэлэлцүүлгийг 9-р сарын 26-ны өдрийн 17:00-18:30 цагийн хооронд Art Space 976 дээр зохион байгуулах аж. Энэхүү хэлэлцүүлгээс уран бүтээлч Г.Гэрэлхүү болон түүний бүтээлүүдийн талаар илүү ойлголтыг олж авах боломжтой гэж зохион байгуулагчид ярьж байна.
Уран бүтээлч Г.Гэрэлхүү нь ДУДС-ийн монгол зургийн ангийг 2010 онд төгссөн. Түүний бүтээлүүд ихэвчлэн хүмүүс хоорондын болон өөрөө өөртэйгөө хийх тэмцлийн талаар өгүүлдэг. Тэрбээр хорь гаруйхан настайдаа олон улсын чанартай үзэсгэлэнгүүдэд уригдан оролцож эхэлсэн юм.
Японы Фукуокогийн Азийн Триенналь, Австралийн Куйнслэндийн Ази Номхон Далайн Триенналь, Гонг Конгийн Шоени галерейд болсон “Хотын Хүүрнэл”, Шанхайн үндэсний уран зургийн музейд болсон “Хамтдаа”, Германы Норд Арт зэрэг олон улсын үзэсгэлэнгүүдэд бүтээлүүд нь дэлгэгдэж байв.
Эх орондоо Занабазарын музей болон 976 Арт галерейд бие даасан үзэсгэлэнгүүдээ гаргаж, Урчуудын эвлэлийн хороо, Монголын үндэсний уран зургийн галерейн уламжлалт үзэсгэлэнгүүдэд жил бүр оролцож ирсэн юм. Түүний бүтээлүүдийг Японы Фукуокогийн Азийн Урлагийн Музей, Австралийн Куйнслэндийн Орчин Үеийн Урлагийн Музей зэрэг дэлхийн томоохон музейнүүд өөрийн цуглуулгадаа худалдан авч байжээ.