Уншиж байна ...
ХУУЧИРСАН МЭДЭЭ: 2019/08/30-НД НИЙТЛЭГДСЭН

528 боловсролын байгууллагаас Гамшгаас хамгаалах хууль тогтоомжтой холбоотой 2,100 зөрчил илэрчээ

А.Намуун, iKon.mn
2019 оны 8 сарын 30
iKon.MN
Зураг зураг

Онцгой байдлын ерөнхий газрын даргын нэрэмжит боловсролын байгууллагуудад зохион байгуулагдаж байгаа Гамшгаас хамгаалах болон Галын аюулгүй байдлын тухай хууль, стандарт, норм, нормативын баримт бичгийн хэрэгжилтийг хангуулах төлөвлөгөөт хяналт шалгалт дөрөв дэх өдрөө улсын хэмжээнд үргэлжилж байна.

Хяналт, шалгалтад өнөөдрийн байдлаар их, дээд сургууль, коллеж, сургуулийн дотуур байр, мэргэжил сургалт үйлдвэрлэлийн төв, ерөнхий боловсролын сургууль, сургуулийн өмнөх боловсролын байгууллагын нийт 528 барилга байгууламжийг хамруулаад байгаа аж.

Эдгээр боловсролын байгууллагаас гамшгаас хамгаалах болон галын аюулгүйн норм нормативын баримт бичгийн шаардлагыг зөрчсөн 2,100 зөрчлийг илрүүлж, газар дээр нь 320 зөрчил буюу 15.2 хувийг арилгуулан зөвлөгөө өгсөн байна.

Харин бусад зөрчлийг арилгуулахаар Гал түймрийн улсын хяналтын байцаагчийн заавал биелүүлэх албан шаардлага, мэдэгдэл, танилцуулга, дүгнэлтийг байгууллагын шийдвэр гаргах эрх бүхий албан тушаалтанд хүргүүлж, хэрэгжилтэд нь хяналт тавин ажиллажээ.

Хяналт, шалгалтаар:

  • Гамшгаас хамгаалах төлөвлөгөөг боловсруулж мэргэжлийн байгууллагаар батлуулаагүй,
  • Гамшгаас хамгаалах төлөвлөгөөнд тодотгол хийгээгүй,
  • Байгууллагын аюулгүй байдлыг хангуулах чиглэлээр шаардагдах хөрөнгийн эх үүсвэрийг төлөвлөөгүй,
  • Барилга байгууламжид зарлан мэдээлэх ба нүүлгэн шилжүүлэлтийг удирдах системгүй,
  • Гал түймрээс хамгаалах тоног төхөөрөмж,
  • Анхан шатны багаж хэрэгсэл зэрэгт техникийн үйлчилгээ хийж,
  • Ашиглалтын бэлэн байдлыг бүрэн хангаагүй,
  • Гал унтраах автомат төхөөрөмж болон галын дохиоллын систем суурилуулаагүй,
  • Аврах гарцыг хааж битүүлж эд бараа материал хураасан,
  • Сургууль, цэцэрлэгийн цайны газарт хийн баллон ажиллуулж, аюулгүй байдлыг ханган ажиллаагүй зэрэг нийтлэг зөрчлүүд илэрчээ.

    Хичээлийн шинэ жил эхэлж байгаатай холбогдуулан сурч хүмүүжих орчны аюулгүй байдлыг хангуулах, болзошгүй эрсдэлээс урьдчилан сэргийлэх зорилгоор зохион байгуулагдаж буй тус хяналт, шалгалт энэ сарын 31-нийг хүртэл үргэлжилнэ гэж Онцгой байдлын ерөнхий газраас мэдээллээ.