ДАШТ: Монголын гурван тамирчин жүдогийн ДАШТ-ээ өндөрлүүлэв
Жүдо бөхийн насанд хүрэгчдийн дэлхийн аварга шалгаруулах тэмцээн Японы улсын нийслэл Токио хотноо үргэлжилж байна.
Өчигдөр буюу тэмцээний хоёр дахь өдөр эрэгтэйчүүдийн 66 кг-ын жинд барилдсан Ё.Басхүү шагналт байр буюу 5-р байрт орж, тэмцээнээ өндөрлүүлсэн.
Тэгвэл гурав дахь өдөр буюу өнөөдөр Монгол Улсын баг тамирчид харамсалтайгаар тэмцээнийг өндөрлүүлж байна. Тухайлбал, 73 кг-ын жинд барилдаж байгаа Г.Одбаяр шөвгийн 16-д шалгарсан ч Турк улсын жүдочин Жилоглу Билалтай хүндхэн барилдаан хийв. Тэрбээр нэмэлт цаг сунгаж барилдсан боловч гурван удаа торгуулсан юм.
Эмэгтэйчүүдийн 57 кг-ын жинд барилдсан Л.Энх-Отгон, эрэгтэйчүүдийн 73 кг-ын жинд барилдсан Ц.Цогтбаатар нарын хувьд мөн ДАШТ өнөөдрөөр дуусаж байна.
Маргааш болох дөрөв дэх өдрийн барилдаанд манай улсаас эрэгтэйчүүдийн 81 кг-ийн жинд О.Ууганбаатар барилдана. Тэрбээр өнгөрсөн дөрөвдүгээр сард болсон Ази, Номхон далайн бүсийн аврага шалгаруулах тэмцээнд амжилттай оролцож Азийн аварга болсон билээ. Харин эмэгтэйчүүдийн 63 кг-ийн жинд Монгол Улсын гавьяат тамирчин Б.Мөнгөнчимэг болон Олон улсын “Их дуулга” тэмцээний хүрэл медальт Б.Ганхайч нар барилдах юм.
- 90кг: Олон улсын хэмжээний мастер Г.Алтанбагана
- -100кг: ДАШТ-ын хүрэл медальт, Азийн аврага Л.Отгонбаатар
- +100кг: Хөдөлмөрийн баатар, олимпийн алт,мөнгөн медальт, ДАШТ-ын хүрэл медальт Н. Түвшинбаяр, ДАШТ-ын хүрэл медальт Ө.Дүүрэнбаяр
Эмэгтэй
- 70кг: Олон улсын хэмжээний мастер Ц.Энхчимэг
- 78кг: Олон улсын хэмжээний мастер О.Мөнхцэцэг нар ДАШТ-ийг үргэлжлүүлнэ.
