Орхон аймгийн Цэргийн штабын дарга иргэн Б ажлын өрөөндөө буудуулж нас барсан хэмээх мэдээлэл зарим мэдээллийн хэрэгслээр тархаад байна. Энэ талаар Цагдаагийн ерөнхий газрын хэвлэлийн төлөөлөгч, цагдаагийн ахмад М.Мөнхшүрээс тодрууллаа.
-Орхон аймгийн Цэргийн штабын дарга ажлын өрөөндөө нас барсан хэрэг гарлаа гэх мэдээлэл тархаад байна. Энэ талаар тодруулъя?
-Орхон аймгийн цагдаагийн жижүүрийн утсанд өчигдөр буюу наймдугаар сарын 5-ны өдрийн 14:31 цагийн орчимд манай дарга ажлын өрөөндөө нас барсан байна гэх дуудлага мэдээлэл бүртгэгдсэн.
Дуудлага мэдээллийн дагуу шалгалтын ажиллагаа явуулахад Орхон аймгийн Засаг даргын Тамгын газрын Цэргийн штабын дарга Б нь ажлын байрандаа нас барсан нөхцөл байдал тогтоогдсон. Цагдаагийн байгууллага уг хэргийн шалгалтын ажиллагааг явуулж байна.
-Буудуулсан байдалтай олдсон гэсэн?
-Тухайн галт зэвсэг ямар маркийн, хэний эзэмшлийн бүртгэл, судалгаатай вэ гэдэгт эхний ээлжинд шалгалтын ажиллагаа явуулна. Дараагаар нь өөрийн амийг хорлосон уу, гадны нөлөөтэй юу гэдгийг тогтооно.