Марвелийн супер баатруудын тухай “Avengers: Endgame” киноны орлого түүхэн дээд амжилт тогтоож, Жэймс Камероны “Аватор” бүтээлийн 10 жилийн ноёрхлыг халсан тухай Дисней компани Ням гарагт зарлалаа.
Дөрөвдүгээр сарын 26-нд нээлтээ хийж байсан уг бүтээлийн кинотеатруудаас олсон орлогын нийлбэр 13 долоо хоногийн дараа буюу өчигдөр $2.7902 тэрбум хүрсэн байна.
2009 онд гарч байсан “Аватар” өнгөрсөн хугацаанд нийт $2.7897 тэрбумын орлого олоод байв.
Бямба гарагт Марвел Студи болон түүнийг эзэмшигч Дисней компани өөрсдийнх нь бүтээсэн киноны орлого “Аватар”-ын орлогыг гүйцэхэд $500,000 дутуу байгааг зарлаад, уг зөрүү Ням гарагт нөхөгдөх боломжтойг урьдчилан мэдээлж байсан юм.
Дисней компани нь “Аватар”-ыг бүтээсэн “21stCentury Fox” студийг худалдаж авсан тул орлогын түүхэн дээд амжилтыг эзэмшигч хоёр кино хоёул тус компанид харьяалагдаж байна.
“Avengers: Endgame” киног бүтээх, сурталчлахад нийт $500 саяын зардал гаргаж байжээ.
Эх сурвалж: AFP