Хөнгөн атлетикийн тамирчин Б.Мөнхзаяа олимпын эрхийн болзол дахин хангалаа
Монголын хөнгөн атлетикийн үндэсний шигшээ баг, “Алдар” спорт хорооны тамирчин, олон улсын хэмжээний мастер(ОУХМ) Б.Мөнхзаяа энэ оны хоёрдугаар сард Хонг Конгод болсон олон улсын тэмцээнд VI байрт шалгарахдаа 2019 оны ДАШТ, “Токио-2020” олимпод хурд сорих болзол хангасан билээ.
Анх 17 насандаа эл спортоор хичээллэн, амжилтын төлөө ес дэх жилээ зүтгэж буй тэрбээр Австралид өчигдөр буюу долоодугаар сарын 7-нд болсон “Алтан зам” ангиллын тэмцээнд урилгаар оролцохдоо олимпын зай болох бүтэн марафон буюу 42 км зайд хоёр цаг, 29 минут, 18 секунд гүйж, IV байрт шалгарчээ.
Б.Мөнхзаяа хэдийгээр медаль хүртээгүй ч “Токио-2020”-д өрсөлдөх болзол дахин хангаж, улсынхаа дээд амжилтыг шинэчиллээ. Тус тэмцээнд Монголын таван тамирчин хурд сорьсноос ОУХМ Ц.Бямбажав XI байрт шалгарч, энэ жил ДАШТ-д оролцох эрх авлаа.
Б.Мөнхзаяа нь Риогийн олимпод анх хурд сорихдоо 72 дугаар байрт шалгарсан бөгөөд 3, 5, 10, 21, 42 км гэсэн таван зайд Монгол Улсын дээд амжилтыг эзэмшдэг. Тэрбээр 2017 онд Тайванийн марафонд түрүүлэхдээ тус тэмцээнээс алтан медаль хүртсэн Монголын анхны, Азийн хоёр дахь тамирчин болсон юм.
