Азийн Буддистуудын энх тайвны 11 дэх бага хурлыг Гандантэгчэнлин хийд, ШУА, МУИС, ШУТИС хамтран энэ сарын 22-23-нд Улаанбаатар хотноо зохион байгуулах гэж байна.
“Сэргэе-урагшилъя” уриатай энх тайвны бага хурлын үеэр “XXI зууны буддын өв соёл,үнэт зүйл” сэдэвт олон улсын эрдэм шинжилгээний хурлыг зохион байгуулна. Эрдэм шинжилгээний бага хуралд таван улсын 30 гаруй эрдэмтэн, судлаач илтгэл хэлэлцүүлнэ хэмээн зохион байгуулагчид онцолж байв.
Бага хурлын ерөнхий чуулганы зохион байгуулагч Б.Батаа “АБЭТБХ нь НҮБ-д бүртгэлтэй цөөн шашны байгууллагуудын нэг юм. Байгууллагын ерөнхийлөгчөөр МБШТ Гандантэгчэнлин хийд тэргүүн хамба лам, гавж Д.Чойжамц ажиллаж байгаа.
50 жилийн хугацаанд 10 удаа хуралдаж энх тайван, эв нэгдэл, энэрэнгүй үйлсийн тунхаглалаа дэлхийд хүргэсээр ирсэн бага хурал өдгөө зургаа дахь удаагаа манай улсад зохион байгуулагдаж байна.
Энэ удаагийн хуралдаанд Энэтхэг, Солонгос, Орос, Шри-Ланка, Япон зэрэг гишүүн улс орнуудын 14 үндэстний 150 гаруй зочин, төлөөлөгч хүрэлцэн ирнэ” гэв.
Бага хурлын нээлтийн ёслолын ажиллагаа Гандантэгчэнлин хийдийн Батцагаан цогчин дуганы өмнөх талбайд зургаадугаар сарын 21-ний 09:00 цагт эхэлнэ. Нээлтийн үйл ажиллагаанд сүсэгтэн олон оролцох боломжтой юм байна.