“Челси” Евро лигт хоёр, “Ливерпүүл” Аваргуудын лигт зургаа дахиа түрүүллээ

Буурал тивийн хамгийн нэр хүндтэй лигүүд дууссанаар хөлбөмбөгийн нэгэн улирал өндөрлөж байна. Европын хөлбөмбөгийн тэмцээн аваргуудын лигээр отголсон бөгөөд Английн “Ливерпүүл” зургаа дахь удаагаа цом өргөв. Харин евро лигт “Челси”хоёр дахь түрүүлсэн юм. Аваргуудын лиг болон евро лигийн финалд Английн дөрвөн баг шалгарсан анхны тохиолдол нь энэ байсан. Энэ нь 2018-2019 оны улирлын гол онцлог байлаа. Ингээд хамгийн сүүлд болсон евро лиг болон аваргуудын лигийг тоймлон хүргэе.

ЕВРО ЛИГ

 

Челси 4:1 Арсенал

Азербайжаны нийслэл Баку хотноо Европын лигийн финалын тоглолт болсон. Энэ тоглолт Английн “Челси”, “Арсенал”-ын хооронд болсноороо онцлогтой. Товчхондоо бол Лондоны дерби байлаа. “Арсенал”-ын хагас хамгаалагч, армен тоглогч Мхитарян энэ тоглолтод оролцоогүй. Учир нь Армен, Азербайжан улс дайтаж байсан, улс төрийн зөрчилтэй юм.

Мхитарянаас гадна Арсенал” гэмтэлтэй Холдинг, Бельерин, Денис Суарес болон багаа орхисон Рэмзи нарыг алдсан бол “Челси”-гийн Рюдигер, Хадсон-Одои, Лофтус-Чик нар бэртэлтэй байлаа. Эхний үед багууд болгоомжлон, хаалгаа хамгаалаад байсан бол хоёрдугаар үед огт өөр тоглолт гарсан. 49 дэх минутад Жиру Эмерсоны дамжуулалтаар оновчтой мөргөн, хуучин багтаа эхний гоол хийсэн ч тэр баяраа тэмдэглээгүй.

Хаалгач Чехэд хаах боломж байсангүй. Тооны харьцааг тэнцүүлэх шаардлагатай болсон “Арсенал” урагш дайрахаас өөр аргагүй болсон. Гэвч 10 минутын дараа дахин гоол алдлаа. Энэ удаад Педро Азарын дамжуулалтаар бөмбөгийг торонд оруулсан. Таван минутын дараа Жируг Мэйтленд-Найлс унагааснаар Азар 11 метрээс оновчтой цохиж, 3:0 боллоо. Тоглолтод хэн ялах нь ойлгомжтой болох нь тэр.

Эмери давхар сэлгээ хийж, сэлгээгээр гарсан Ивоби алсын цохилтоор гайхамшигтай гоол хийсэн ч “Арсенал” үүнээс илүү зүйл хийж чадсангүй, цаг ч үлдсэнгүй. Азар, Жиругийн хослол дахин амжилттай довтолсноор “Челси” 4:1 -ээр ялалт байгууллаа. Сарригийн хувьд энэ нь анхны цом байсан бол Педро дэлхийн аварга, Европын АШТ, Аваргуудын лиг, Испанийн лигийн цом дээрээ бас нэгэн цом нэмж байгаа юм.

Энэ тоглолт “Арсенал” багийн хаалгач Чехийн сүүлийн тоглолт болсон. Замналын ихэнх жилээ “Челси”-д өнгөрөөсөн тэр зодог тайлаад “Челси”-дээ захирлын албан тушаалд буцан очиж байгаа юм. Мөн Эден Азар хамгийн сүүлийн тоглолтоо “Челси”-д хийв. Ялалтын дараа тэр “Хагацах цаг боллоо” гэсэн утгатай битүүлэг үг хэлсэн билээ. Ийнхүү “Арсенал” гурван жил дараалан аваргуудын лигт тоглохгүй боллоо.

Дасгалжуулагч Сарри энэ цомоороо “Челси” багаас халагдах аюулаас аврагдсан байж болох юм. Сарри тоглолтын дараа “Би багтаа үлдэх эрхтэй. Гэхдээ энэ асуудлыг би шийдэхгүй” гэж хэлсэн. Зарим мэдээллээр түүнийг “Ювентус” сонирхож байгаа гэнэ.

АВАРГУУДЫН ЛИГ

Тоттенхэм 0:2 Ливерпүүл

Европын хөлбөмбөгийн улирлын аваргуудын лигийн 2018-2019 оны шигшээ тоглолт өндөрлөлөө. Энэ жилийн аваргуудын лигийн шигшээ тоглолтод Английн хоёр баг болох “Ливерпүүл” болон “Тоттенхэм” клуб шалгарсан. “Ливерпүүл” клуб ес дэхээ аваргуудын лигийн шигшээд шалгарсан бол “Тоттенхэм” клуб анх удаа гэдгээрээ онцлогтой. “Ливерпүүл” клуб тоглолтын эхний довтолгоогоороо л гоолын боломжийг бий болгов.

Манег хамгаалах гэсэн Сиссоко гар хүрснээр “Ливерпүүл”-п 11 метрийн цохилтыг бэлэглэв. Мэдээж “Улаанууд” боломжийг сайн ашигласан. Ингээд Салах эхний гоолыг оруулсан бөгөөд тэрбээр аваргуудын лигийн шигшээ тоглолтод хамгийн богино хугацаанд гоол оруулсан хоёр дахь тоглогч болов. Өөрөөр хэлбэл, хамгийн хурдан гоол орсон хоёрдугаарт бүртгэгдлээ.

Түүнээс өмнө 2005 оны аваргуудын лигийн шигшээ тоглолтод “AC Милан”-ы хамгаалагч Малдини “Ливерпүүл”-ийн хаалганд эхний минутад гоол оруулж байжээ. Салахын гоолоос хойш гоол оролгүй тоглолтын 87 дахь минут хүргэсэн бөгөөд сэлгээгээр талбайд гарсан Ориги алсын цохилтоор багийнхаа ялалтыг баталгаажуулав. “Ливерпүүл” ийнхүү зургаа дахь удаагаа аваргуудын лигийн цом өргөж байгаа нь энэ.

Статистик мэдээ:

• Салах аваргуудын лигийн шигшээд гоол оруулсан Африкийн тав дахь тоглогч
• Клопп “Ливерпүүл”-ийг аваргуудын лигийн цомд хөтөлсөн дөрөв дэх дасгалжуулагч
• Ориги аваргуудын лигийн шигшээд гоол оруулсан Бельгийн хоёр дахь тоглогч
• “Ливерпүүл” зургаан цомтой болсноор “Реал Мадрид” (13), “AC Милан”-ы (7) дараа оров.