Уншиж байна ...
Зураг
Зураг
ХУУЧИРСАН МЭДЭЭ: 2019/05/25-НД НИЙТЛЭГДСЭН

Хятад улс 600 км/цаг хурдтай галт тэрэгний загвараа танилцууллаа

Э.Сэмүүн, ikon.mn
2019 оны 5 сарын 25
iKon.MN
Зураг зураг

Хятадын төрийн өмчит CRRC (China Railway Rolling Stock Corporation) компани өчигдөр өөрийн зохион бүтээсэн хурдан галт тэрэгний туршилтын загварыг танилцуулжээ.

Цагт 600 км хурдлах чадвартай уг тээврийн хэрэгслийг одоо туршиж эхлээд 2021 оноос үйлдвэрлэх юм байна.

Ийм галт тэргээр Бээжин, Шанхай хотуудын хооронд 3.5 цагийн хугацаанд зорчих юм. Одоогоор эдгээр хотуудын хооронд нисэх онгоцоор зорчиход 4.5 цаг зарцуулж байгаа. Онгоцны дундаж хурд цагт 800-900 км хүрдэг ч онгоцонд бүртгүүлж суух, хөөрөх, газардах зэрэг үйлдлүүд нэлээд хугацаа авдаг.

Шинэ галт тэрэг ийм өндөр хурдтай байх нөхцлийг түүнд ашигласан MAGLEV (Magnetically Levitated) технологи бий болгож байна. Төмөр зам, галт тэрэгний дугуй хооронд соронзон орны хүчээр хөндий зай үүсгэдэг тул ямар нэг үрэлт, эсэргүүцлийн хүчний нөлөөгүйгээр хурдлах боломж олгож байгаа юм.

Хятад улс одоо MAGLEV технологийн галт тэргийг Шанхай хотын төвийг нисэх онгоцны буудалтай холбосон 30 км замд ашиглаж байгаа. Энэхүү унаа нь цагт 431 км хурдалдаг бөгөөд өнөөдөр дэлхий дээр ашиглагдаж байгаа хамгийн өндөр хурдтай MAGLEV болж байна.

600 км/цаг хурдыг өмнө нь Япон улс 2015 онд мөн MAGLEV технологийн галт тэргээр тогтоогоод байсан юм. Тэгвэл Хятад улс дэлхийд хоёр дахь удаагаа 600-ын хурдны босгыг давжээ.

Японы анхны MAGLEV галт тэрэг Токио, Нагоягийн хооронд 2027 оноос аялж эхэлнэ.

 

Эх сурвалж: The Verge