Филиппиний ерөнхийлөгч сүрдүүлсний дараа Канад улс хог хаягдлаа буцааж авахаар боллоо

Филиппин, Канад улсуудын хооронд олон жил үргэлжилсэн хог хаягдлын маргаан байдаг.

2013-2014 онуудад Канадын хувийн компани “дахин боловсруулагдах” нэрээр их хэмжээний хог хаягдлыг Филиппин рүү илгээсэн юм. Гэвч ирсэн ачаа нь үнэндээ боловсруулагдах боломжгүй ахуйн хаягдал байжээ.

Филиппиний тал хогоо буцааж авахыг Канадын засгийн газраас олон удаа шаардсан ч хэрэгжилгүй өнөөдрийг хүрсэн юм. Саяхан Филиппиний ерөнхийлөгч Родриго Дутерте 69 чингэлэг хогийг Канад руу буцааж илгээх даалгаврыг засгийн газартаа өгсөн байна.

Хэрвээ хог хаягдлаа хүлээж авахаас татгалзвал Канадын эргийн ойролцоо далайд асгахыг тэр бас тушаажээ.

Тэгвэл өчигдөр буюу Лхагва гарагт Канадын байгаль орчны сайд Катерин Маккена ачаа тээврийн компанитай гэрээ байгуулж, хог хаягдлаа Филиппинээс буцаах болсноо зарласан байна.

Канадын засгийн газар тавдугаар сарын 15-ны дотор хог хаягдлаа авах амлалтыг Филиппиний талд өгсөн ч биелүүлээгүй юм. Үүний дараа Филиппин улс Канад дахь элчин сайдаа буцааж дуудсан байна.

Канадын ерөнхий сайд Жастин Трюдо хууль бусаар Филиппинд илгээсэн хогийг буцааж авах ажлыг эхлүүлэлгүй удаасан гол буруутан нь юм. Тэр 2017 онд хогийг буцаах ажил “онолын хувьд” шийдэгдсэн гэж мэдэгдэж байсан ч онолоо бодит ажил болголгүй өнөөдрийг хүрсэн ажээ.

Эх сурвалж: Associated Press