Япон хүний бүтэн нэрийг зөв дарааллаар бичдэг болохыг уриалжээ
Япон хүний нэрийг зөв дарааллын дагуу бичиж, дуудаж байхыг олон улсын хэвлэл мэдээллийн байгууллагуудаас албан ёсоор хүсэх гэж байгаагаа Японы гадаад хэргийн яам өчигдөр мэдээлжээ.
Жишээ нь тус улсын ерөнхий сайдын нэрийг дэлхий дахинд Шинзо Абэ гэж бичиж, дуудаж хэвшсэн бол зөв хувилбар нь Абэ Шинзо юм байна.
Азийн Хятад, Солонгос зэрэг үндэстнүүд хүний нэрийг бичихдээ эхэнд нь овгийн нэрийг, дараа нь тухайн хүний нэрийг бичдэг. Жишээ нь Ши Жиньпин, Мүүн Жэ Ин гэх мэт. Тэгвэл япончууд мөн адил овог, нэр гэсэн дарааллаар бичдэг боловч гадаад ертөнцөд эсрэгээр нь бичдэг болсон байна.
Одоогийн нэр, овог дараалал нь 19 дүгээр зууны сүүлчээр Япон орон өрнийн соёлд хаалгаа нээж, нийгмээ шинэчилж эхлэх үед Европ нэрний бүтцийг дуурайлган тогтсон жишиг ажээ. Нэрний дарааллыг засах зөвлөмжийг 2000 онд үндэсний хэлний зөвлөл гаргаж байсан ч хэрэгжээгүй өнөөдрийг хүрсэн байна.
Тэгвэл Японы гадаад хэргийн яам шинэ Рэйвагийн он тооллоос эхлэн дэлхий дахинд япон нэрсийг зөв бичиж, дууддаг болгох зорилт тавьжээ.
“Би олон улсын хэвлэл мэдээллийн байгууллагуудад хүсэлт явуулахаар төлөвлөж байна” гэж хэлсэн гадаад хэргийн сайд өөрийн нэрийг Таро Коно биш, Коно Таро гэж бичиж хэвшихийг гадаадын сэтгүүлчдэд зөвлөсөн байна.
Эх сурвалж: The Guardian
