Уншиж байна ...
Зураг
Зураг
ХУУЧИРСАН МЭДЭЭ: 2019/04/03-НД НИЙТЛЭГДСЭН

Нисэх онгоц сураггүй алга болдог явдлыг зогсоох систем ажиллаж эхэллээ

Э.Сэмүүн, ikon.mn
2019 оны 4 сарын 3
iKon.MN
Зураг зураг

Таван жилийн өмнө Малайзын агаарын тээврийн MH370 нисэх онгоц зорчиж яваад сураггүй алга болсон нь одоо болтол олдоогүй байгаа билээ.

Тэгвэл ийм асуудлыг дахиж гаргуулахгүй байх зорилготой хиймэл дагуулын технологид суурилсан системийг өчигдрөөс нэвтрүүлж эхэлжээ.

Уг систем нь дэлхийн аль ч цэгт нисэж яваа онгоцны хөдөлгөөнийг тасралтгүй хянах чадвартай. 

Дэлхийн агаарын орон зайн 70 орчим хувь нь ийм хяналтгүй байдаг. Шинэ систем энэхүү сул орон зайг дүүргэж байгаа юм.

Эхний ээлжинд Атлантын далайн умард хэсгийн хөдөлгөөнийг хянаж эхлэх бөгөөд цаашдаа дэлхийг бүхэлд нь хамрах ажээ. Шинэ системийг Их Британи, Канад улсууд хамтран бүтээсэн байна.

Системийг нэвтрүүлж байгаа Aireon компанийн гүйцэтгэх захирал Дон Тома “Түүхэнд анх удаа бид ADS-B технологитой бүх нисэх онгоцнуудын хөдөлгөөнийг тасралтгүй хянах боломжтой болж байна” гэж мэдэгджээ.

ADS-B (Automatic Dependent Surveillance Broadcast) технологи нь онгоцны байрлалыг автоматаар тодорхойлж, гадагш мэдээлж байдаг юм. Орчин үеийн загварын нисэх онгоцнууд бүгд ийм технологитой байдаг.

Хяналтын шинэ системд Iridium компанийн 66 хиймэл дагуулыг ашиглаж байгаа ажээ.

Ирэх оноос эхлэн АНУ, Европт ADS-B технологийг нисэх онгоцнуудад заавал нэвтрүүлсэн байх шаардлага тавигдах юм.

Одоо нисэх онгоцнууд далай дээгүүр нисэхдээ 15 минут тутамд байрлалаа газарт радио холбоогоор мэдээлж байдаг. Гэхдээ энэ нь найдваргүйд тооцогддог.

Харин одоо найман секунд тутамд байрлалаа хиймэл дагуулын тусламжтай дамжуулж байх юм.

Малайзын иргэний агаарын тээврийн MH370 нисэх онгоц 2014 оны гуравдугаар сарын 8-ны өдөр Куала-Лумпураас Бээжинг чиглэн нисээд сураггүй алга болж байв. Уг онгоцыг Энэтхэгийн далайн өмнөд хэсэгт унасан гэж таамагладаг юм.

 

Эх сурвалж: The Guardian