"Улаанбаатар Сонгдо" эмнэлгээс таван аврагчийг урьдчилан сэргийлэх үзлэг, оношилгоонд хамрууллаа

"Улаанбаатар Сонгдо" эмнэлгээс нийгмийн хариуцлагынхаа хүрээнд Онцгой Байдлын Ерөнхий Газрын харьяа Үндэсний аврах бригадын таван аврагчийг урьдчилан сэргийлэх багц үзлэг, оношилгоонд хамрууллаа.

Тэдгээр таван аврагч нь хоёрдугаар сарын 28-нд Төв аймгийн Заамар сумын нутагт гарсан ил уурхайн нурангиас дөрвөн иргэнийг эрэн хайх, аврах ажиллагаанд оролцсон юм байна.

 

“Улаанбаатар Сонгдо” эмнэлгийн уушгины эмч Н.Нарьяа "Манай эмнэлэг үүсгэн байгуулагдсан цагаасаа хойш 11 жил урьдчилан сэргийлэх багц оношилгоог хийж байна. Түүнчлэн жил бүр нийгмийн хариуцлагынхаа хүрээнд хүнд нөхцөлд ажиллаж буй хүмүүсийг багц шинжилгээнд үнэ төлбөргүй хамруулахыг зорьдог.

Энэ жилийн хувьд онцгой байдлын таван аврагчийг 250 мянган төгрөгийн үнэ бүхий багц оношилгоонд хамруулж байна.

Ер нь хаврын улиралд иргэд маань эрүүл мэнддээ анхаарч, урьдчилан сэргийлэх үзлэг оношилгоонд хамрагдах шаардлагатай. Багц оношилгоо нь тухайн хүний эрүүл мэндийн мэдээллийг нэг дор цогцоор нь гаргах, цаашид эмчилгээний төлөвлөгөө гаргаж, дүгнэлт өгөхөд хялбар болгодог" хэмээн тайлбарлалаа.

Эрэн хайх, аврах ажиллагаанд онцгой байдлын байгууллагаас 30 гаруй алба хаагч оролцсоноос гурван шумбагч, хоёр уул уурхайн аврах ажиллагааны мэргэжилтэнг өнөөдөр урьдчилан сэргийлэн үзлэг, оношилгоонд хамруулж байгаа нь энэ ажээ.

Нурангийн талбайд хөрсний усны ундрага ихтэй, уурхайн хананаас ус урсаж байсан учир эрэн хайх ажиллагаа явуулахад хүндрэл үүсгэж, хананд хөлдсөн мөс нурвал аврах ажиллагаа явуулж буй хүмүүсийн дээрээс унах аюултай байв.

Эрэн хайх, аврах ажиллагааны үеэр аврагчид 7-8 метрийн гүнд дунджаар 30 орчим минутын хугацаатай шумбалтуудыг хийж байсан юм.