Хятадын гангийн экспорт буурч байна
Хятадын Гаалийн ерөнхий газрын мэдээллээр, тус улс хоёрдугаар сард 4.51 сая тонн ган экспортолсон нь 2013 оноос хойших хамгийн доод үзүүлэлт болж байна. Тодруулбал хоёрдугаар сарын гангийн экспортын дүн нь өмнөх нэгдүгээр сарынхаас 27%-иар, өмнөх оны мөн үеийнээс 7%-иар тус тус буурчээ. Хятад улс оны эхний хоёр сарын нийт дүнгээр 10.69 сая тонн ган бүтээгдэхүүн экспортлоод буй юм.
Түүнчлэн, төмрийн хүдрийн импорт хоёрдугаар сард 83.08 сая тонн буюу өнгөрсөн оны мөн үеэс 1.5%-иар буурсан байна. Нэгдүгээр сард 91.26 сая тонн төмрийн хүдэр импортолжээ. Энэ сард ойролцоогоор 71.8 сая тонн төмрийн хүдэр импортлох таамаглалыг Хятадын түүхий эдийн биржийн шинжээчид дэвшүүлж байна.
Хятад нь агаарын бохирдолтой тэмцэх үүднээс “13 дугаар 5 жилийн төлөвлөгөө”-гөөр (2016-2020 он) гангийн үйлдвэрлэлээ 150 сая тонноор бууруулах зорилтыг дэвшүүлсэн юм. Энэ дагуу 2016 онд 65 сая, 2017 онд 55 сая, 2018 онд 35 сая тонноор тус тус танаж, төлөвлөгөөгөө давуулан биелүүлээд буй. Гэсэн хэдий ч энэ онд нэмж 20 сая тонноор бууруулахаар төлөвлөж байна.
Уг нөхцөл байдалтай холбоотойгоор Хятадын гангийн томоохон үйлдвэрлэгчид “Benxi steel” болон “Ansteel group” хоорондоо нэгдэхээр 2005 онд эхлүүлсэн хэлэлцээрээ зогсоож буйгаа мэдэгдсэн. Өнгөрсөн оны үзүүлэлтээр “Ansteel group” 35 сая тонн гангийн үйлдвэрлэлээр Хятадад дөрөвдүгээрт эрэмбэлэгдсэн бол “Benxi steel” нь 20 сая тонн ган үйлдвэрлэж есдүгээрт жагсжээ.
