Ээлжит бус чуулганаар хэлэлцэх асуудлуудын бэлтгэл ажлыг хангах хүрээнд УИХ-ын Тамгын газар, Эдийн засгийн байнгын хороо, Монголбанк хамтран "Тинк банк 2019-Мөнгө санхүүгийн орчин" хэлэлцүүлгийг Төрийн ордонд зохион байгуулж байна.
Хэлэлцүүлгийн үеэр "Глобал" эдийн засгийн хүрээлэнгийн захирал, эдийн засагч Р.Амаржаргал "Гадаадын банкны санхүүгийн зах зээлд үзүүлэх нөлөө, нэвтрүүлэхэд тохиолдох эрсдлийг бууруулах арга зам" сэдвээр хийсэн судалгаагаа танилцуулсан юм.
Гадаадын хөрөнгө оруулалтын банкны тухай хуулийн төслийг УИХ-д хоёр жилийн өмнө өргөн барьсан ч хэлэлцэгдээгүй өдий хүрсэн билээ. Гадны банк Монголд орж ирэх нь сайн, муу хэмээн ярьдаг ч энэ талаар тухайлбал судалгаа чамлалттай, бараг байдаггүй бөгөөд “Глобал” хүрээлэн Монголд анх удаа макро стресс тестийн аргыг ашиглан энэ талаар шинэ судалгаа хийснийг Р.Амаржаргал онцолсон юм.
Тэрбээр судалгааны дүнгээ танилцуулахын өмнө судлах явцад тулгарсан бэрхшээлүүдийг тодотгож, анхааруулсан.
“Уг нь манай статистикийн байгууллагуудаас хамгийн гайгүй нь Монголбанк, банкны систем шүү дээ. Гэвч бидэнд олдсон датанаас үзэхэд хэр зэрэг үнэн, бодитой мэдээлэл бэлтгэдгийг хэлэхэд их түвэгтэй.
Банкны салбарын нэгдсэн дүн, тооцоо үнэн юм, уу худлаа юм уу гэдэгт би бол эргэлздэг. Яагаад гэвэл арилжааны банкууд нь тайлангаа гаргаж өгөхгүй байна. 3-4 жил тайлангаа гаргаагүй банкууд ч байна шүү дээ. Бие биенээ хуураад байгаа юм уу, мэдэж байгаа мөртлөө мэдэхгүй царайлаад байна уу.
Цаашдаа банкны салбарт гадаадын банк орж ирвэл ямар байх вэ гэдгийг тод харуулъя гэвэл эдийн засгийн үзүүлэлтүүдийн экстрим тохиолдлууд нэгэн зэрэг орж ирэхэд нийлмэл шок нь ямар нөлөө үзүүлэх вэ гэдгийг судалж гаргаж ирэх ёстой.
“Оюу Толгой” хөрөнгө оруулахад шууд дамжаад ДНБ-нд биеллээ олж, өслөө, буурлаа гэдэг нь харагдаж болно. Харин банкаар дамжиж орж ирж байгаа хөрөнгө оруулалт нь шууд ДНБ гэхээсээ илүү хөрөнгийн урсгалаар дамжаад мөнгөний бүтэц, санхүүгийн жуулчлалд илүү нөлөө үзүүлдэг. Тэр нь нэлээд хэдэн алхмын дараа ДНБ-нд илэрлээ олдог.
Дахин хэлэхэд энэ талын мэдээллийн баазтай болох нь чухал байна.
Банкны нийт хувь нийлүүлсэн хөрөнгийн 44.6% нь гадны хөрөнгө оруулалт байна. Монголын банкны системийн нөлөө бүхий банкууд дээр л гэхэд 43.6% байна. Эндээс харахад гадны банкууд хэдийнэ орж ирчихээд, үйл ажиллагаа явуулж байгаа юм байна. Гадаадын банкны актив дотоод банкны активын 35-40 хувьд байх нь зохистой хэмжээ гэсэн судалгаанууд байдаг юм билээ.
Төрийн өмчийн оролцоотой гадаадын банкны асуудлыг нарийвчлан авч үзэх шаардлагатай гэдгийг судалгаа нотолсон” гэлээ.
ДҮГНЭЛТүүдийг тоймлон хүргэвэл:
Тэрбээр “Дотоодын зах зээл, санхүүгийн эх үүсвэр муу учраас гадны эх үүсвэр рүү явах л болж байгаа юм. Гэхдээ тэр гадаад эх үүсвэр гэдэг нь Монголын газар зүйн байрлал, геополитикийн байдлаараа маш тодорхой хязгаарлагдчихсан нь судалгаагаар харагдсан” гэдгийг Р.Амаржаргал тэмдэглээд “Дотоодын санхүүгээ бойжуулж, өргөжүүлэх нь гол чиг шугам. Энэ нь удаан хугацаа, улс төрийн зориг, тэвчээр шаардах ч хамгийн зөв зам. Ядаж эдийн засгийн активаа өргөтгөх бодлого барих хэрэгтэй. Түүнээс биш бизнесээ буцааж аваад, булаацалдаад байхаар яаж хөгжих вэ” гэсэн юм.