Нийслэлийн хэмжээнд 2018 оны хоёрдугаар ээлжийн хугацаат цэрэг татлага 10 дугаар сарын 19-21-ний өдрүүдэд явагдах гэж байна. Энэ талаар өнөөдөр Цэрэг татлагын товчооноос өргөтгөсөн хурал хийлээ.
"Цэрэг татлагыг зохион байгуулахаар нийт 2,223 хүн ажиллаж байна. Цэрэг татлагын байруудыг камержуулан иргэдэд LED дэлгэцээр харуулахад бэлэн болсон.
Зарлан дуудах, мэдэгдэх хуудсын 95.9 хувь нь эзэндээ хүрсэн.
Нийслэлийн хэмжээнд цэргийн албыг мөнгөөр дүйцүүлэн төлүүлэх ажил 92.6 хувьтай байгаа.
I ээлжээс халагдаж ирсэн дайчдыг ажлын байранд хамруулсан. 32 ААН 2,000 гаруй ажлын байрны санал танилцуулсан" хэмээн Нийслэлийн Засаг даргын тамгын газрын Цэргийн штабаас мэдээллээ.
Харин цэргийн албанд залуус эрүүл мэндийн шалтгаанаар тэнцэхгүй байгаа талаар Нийслэлийн эрүүл мэндийн газрын дарга Л.Төмөрбаатар мэдээлэл өглөө.
Тэрбээр "2018 оны нэгдүгээр ээлжийн цэрэг татлагаас 4,801 иргэн буюу 9.5% нь эрүүл мэндийн шалтгаанаар чөлөөлөгдсөн байгаа. Үүнээс 3,781 иргэнийг эрүүл мэндийн байгууллага хяналтдаа авсан. Цэргийн албанд тэнцээгүй шалтгааныг аваад үзвэл мэс засал, гэмтэл 29.9%, чих, хамар хоолой 13.2%, дотрын өвчин 13 хувийг эзэлсэн. Мөн нүд, мэдрэл, харшил, сэтгэцийн эмгэгийн улмаас чөлөөлөгдөж байна.
Таван хувь нь жингээр тэнцээгүй.
Биедээ олон шивээс, олон газар цоолж ээмэг зүүлт зүүсэн нь сэтгэцийн эмгэгийн шалтгаан болж байна.
Өвчний улмаас чөлөөлөгдсөн залууст зөвлөгөө өгөхөөр дууддаг ч ирдэггүй. Тухайн хаягандаа байдаггүй. Эрүүлжүүлэлтийн арга хэмжээнд ирээгүй хүмүүст хариуцлага хүлээлгэдэг эрхзүйн орчин бүрдүүлэх хэрэгтэй.
Цэргийн албанд тэнцээгүй залуусыг эрүүлжүүлэх ажил 86 хувьтай байгаа" гэв.
Бэлтгэл дайчдыг авч явж буй тээврийн хэрэгсэл авто замын нэгдүгээр эгнээгээр явах ёстойг холбогдох албаныхан анхаарууллаа.