Манай улсын иргэд Бүгд Найрамдах Чех Улс болон Шенгений бусад орон руу зорчихдоо тус улсын Элчин сайдын яамаар дамжуулан виз мэдүүлдэг. Тэгвэл өчигдөр буюу аравдугаар сарын 15-наас эхлэн PEI /Passport express international/ компаниар дамжуулан богино хугацааны виз мэдүүлэх боломжтой боллоо.
Энэ талаар БНЧУ-аас Монгол Улсад суугаа Онц бөгөөд Бүрэн эрхт Элчин сайд Ийржий Бродекы "Энэхүү визний төвийг нээснээр богино хугацааны Шенгений виз мэдүүлэх гэж байгаа иргэдийн ая тухайтай байдлыг илүү сайжруулж байгаа юм. Урт хугацааны болон ажил эрхлэлтийн виз мэдүүлгийн явц нь хэвээр үлдэнэ. Улаанбаатар хотод суугаа БНЧУ-ын Элчин сайдын яаманд журмынхаа дагуу мэдүүлнэ.
Мөн бүх төрлийн вик болон оршин суух төрлөөр виз мэдүүлж байгаа визийн мэдүүлгийн шийдвэрийг Элчин сайдын яам гаргадаг нь хэвээр үлдэж байгаа. Богино хугацааны Шенгений визийг Элчин сайдын яам дунджаар ажлын таван хоног дотор шийдвэрлэдэг. Энэхүү визийн төвөөр дамжуулж шинэ үйлчилгээ нэвтрүүлсэнтэй холбогдуулан шийдвэр гаргадаг хугацаа ижил үлдэнэ гэж найдаж байна" гэлээ.
Визний материал хүлээж авах үйл ажиллагаа эхлүүлээд буй PEI компанийн Ерөнхий захирал О.Хулан "Монголчууд маань Чехийн элчинд визэнд ороход маш их ачаалалтай, оочер дугаар ихтэй, хүндрэлтэй байдаг. Тэр бүх ачааллыг бууруулах зорилгоор мөн визэнд орох оочер зарах ч гэдэг юм уу хууль бус үйлдлийг таслан зогсоох зорилгоор энэхүү үйлчилгээг эхлүүлээд байна.
Манайхаар дамжуулан виз мэдүүлэхэд төлбөр нэмэгдэхгүй. Харин үйлчилгээний хураамж төлнө. Түүнээс биш виз мэдүүлэхэд Элчин сайдын яаманд ямар хэмжээний төлбөр төлдөг үү яг адилхан төлбөр хураамж төлнө.
Чехийн Элчин сайдын яамны вэб сайт дээр манай байгууллагын сайт байршиж байгаа. Сайт руу маань нэвтэрч уулзалтын цаг аваад визний материалтай холбоотой зөвлөгөө, тусламж авснаар визэнд орох эрх бүрдэнэ" гэлээ.