Монголын Гэрэл Зурагчдын нэгдсэн холбооноос ээлжит үзэсгэлэнгээ Театрын музейд өнөөдөр дэлгэлээ. Үзэсгэлэнд тавигдсан хийморьлог морьдын шигшмэл 100 зургийг 50 орчим гэрэл зурагчдын 500 бүтээлээс сорчилжээ.
Талд тоос эрчлүүлэн хурдлах омголон морьд, талын салхинаас өөр унаачгүй эрмэг хүлэг, өвлийн хүйтэн зуны халууныг үл ажран морин дэл дээр хийсэх монгол адуучин гээд шилдэг 100 зурагт өгүүлэх түүхүүд нь цор ганц ажээ. Иймд үзэсгэлэнг "Адууны хийморь" гэж нэрлэсэн байна.
Үзэсгэлэн энэ сарын 3-8-ны өдрүүдэд нээлттэй байх тул моринд хайртай монгол хүн та заавал нэг зочлоод гараарай.