Ерөнхий аудитор Д.Хүрэлбаатар Аудитын дээд байгууллагын Азийн XIV чуулганд оролцож байна

Монгол Улсын Ерөнхий аудитор Д.Хүрэлбаатар тэргүүтэй Төрийн аудитын байгууллагын төлөөлөгчид 2018 оны есдүгээр сарын 18-22-ны өдрүүдэд БНСВУ-ын Ханой хотноо зохион байгуулагдаж буй ASOSAI (Аудитын дээд байгууллагын Азийн холбоо) 14 дүгээр чуулганд оролцож байна.

Энэхүү чуулганы хөтөлбөрийн хүрээнд “Тогтвортой хөгжлийн төлөө- Байгаль орчны аудит” сэдвийн дор Азийн аудитын дээд байгууллагууд долоо дугаар зөвлөгөөн, хэлэлцүүлгийг  зохион байгуулж байгаа юм.

Монгол  Улсын Төрийн аудитын дээд байгууллага нь ASOSAI-н Аудитын хорооны гишүүний хувьд Йордан улсын аудитын багтай хамтран хийсэн тус байгууллагын Санхүүгийн тайлангийн аудитын дүгнэлтийг танилцуулна.

 

 

Мөн тус чуулганаар Олон улсын аудитын дээд байгууллага (INTOSAI) -ын мэргэжлийн стандартын хороо, байгаль орчин, мэдээллийн технологийн аудитын ажлын хэсгүүдийн тайланг хэлэлцэж, цаашид аудитын байгууллагууд ялангуяа Азийн бүс нутагт анхаарал татаж буй асуудлуудад ASOSAI-ийн гишүүн байгууллагуудын оролцоо, хамтын ажиллагааг өргөтгөх, аудитын арга зүй, шинэчлэлийн асуудлаар тодорхой шийдвэр гаргахад чуулганы зорилго чиглэгдэнэ.

Тус чуулганы үеэр Монгол Улсын Ерөнхий аудитор Д.Хүрэлбаатар Азийн бусад аудитын дээд байгууллагуудын тэргүүнүүдтэй уулзаж хоёр талт хамтын ажиллагаа, харилцааг хөгжүүлэх талаар санал солилцож байна.

Эх сурвалж: Үндэсний аудитын газар