Улаан загалмайчид Гамшгийн эрсдэлийг бууруулах Азийн сайд нарын хуралд дуу хоолойгоо хүргэж байна

Гамшгийн эрсдэлийг бууруулах Азийн сайд нарын бага хурал үргэлжилж байна. Ази номхон далайн бүсийн Улаан загалмайчид болон Үндэсний нийгэмлэгийн төлөөлөгч 60 гаруй хүн энэхүү хуралд оролцож байгаа юм. 

 Энэхүү хуралд МУЗН-ийн Ерөнхий нарийн бичгийн дарга Н.Болормаа Нийгмийн эмзэг байдлыг бууруулах салбар хуралдаанд оролцож үг хэллээ. Тэрбээр Монгол орны хувьд ихэвчлэн тохиолддог зудын эрсдэлийг бууруулах, зудад нэрвэгдсэн малчдад чиглэсэн хүмүүнлэгийн тусламжийг зохион байгуулж ирсэн тухай ярилаа. Мөн зудад нэрвэгдэсний дараа бус цаг уурын урьдчилан сэргийлэх мэдээнд тулгуурлсан хүмүүнлэгийн тусламжийг зохион байгуулахын ач холбогдлыг онцолсон юм.

Малчдын амьжиргаанд  нөлөөлж буй гамшгийн эрсдэлийг даван туулах чадварт чиглэсэн арга хэмжээг зохион байгуулж, түүний үр нөлөөг сайжруулахын тулд ажиллах нь оновчтой сонголт болохыг хэллээ.

Мөн Ази номхон далайн бүсийн дэд дарга  Мартин Фаллер Ази номхон далайн бүсийн хэмжээнд гамшгийн эрсдэлийг даван туулах үйл ажиллагааны талаар танилцуулж, үр дүнг нэмэгдүүлэхийн тулд хамтын ажиллагааг өргөжүүлэх нь чухал буй талаар асуудал хөндсөн байна. Мөн тухайн орон нутгийн хөгжлийн төвшинд уялдуулан гамшгийн эрсдэлийг бууруулах үйл ажиллагааг зохион байгуулах хэрэгтэй гэж үзлээ. Өөрөөр хэлбэл, тухайн орон нутгийн соёл, ёс заншил, ахуй амьжиргаатай уялдуулан, мэдээлэл сурталчилгааг оновчтой зохион  байгуулж, хүмүүнлэгийн тусламжийн бодит үр нөлөөг дээшлүүлэхэд анхаарч ажиллаж буй талаараа танилцуулсан юм. Мөн хөгжлийн бэрхшээлтэй иргэд, тусгай бүлгийнхэнд зориулсан үйл ажиллагааг орхигдуулалгүй тогтмол зохион байгуулах нь гамшгийн эрсдэлийг бууруулах үйл ажиллагаанд гарах чухал санаачлага хэмээн үзэж байна. 

Гамшгийн эрсдэлийг бууруулах орон нутаг, олон нийтийн гамшгийн эрсдэлийг тэсвэрлэх үйл ажиллагаа сэдэвт салбар хуралдаанд Шведийн Улаан загалмай нийгэмлэгийн Ерөнхийлөгч Маргерита Вольтсром Үндэсний нийгэмлэгүүдийг төлөөлөн саналаа илэрхийлсэн.  Тэрбээр гамшгийн эрсдэлийг бууруулахад орон нутгийн иргэд шийдвэр гаргах төвшинд санал бодлоо илэрхийлэх боломж хомс байдаг. Тиймээс  тэдний санал бодлыг бодлогын төвшинд хүлээн авч хэрэгжүүлэхэд хууль эрх зүйн орчинг сайжруулж, санал бодлыг нь хүлээн авах, хэрэгжүүлэх механизм бүрдүүлэхийг онцолсон.  

Гамшгийн эрсдэлийг бууруулах Азийн сайд нарын бага хуралд ОУУЗУХСНХ болон ОУУЗХ, Үндэсний нийгэмлэгүүдийн төлөөлөгчид оролцож, бага хурлаас гарах бодлогын баримт бичгүүдэд чухал үүрэг гүйцэтгэх юм. 

Ази номхон далайн бүсийн захирал Хавиэр Кастеяанос Гамшгийн эрсдэлийг бууруулахад орон нутаг олон нийтийн тэсвэрлэх  чадавхийг бэхжүүлэх үйл ажиллагаа салбар  хуралдааныг удирдан явуулж байна. 

Гамшгийн эрсдэлийг бууруулах Азийн сайд нарын хуралд зориулсан үзэсгэлэн гаргав

Гамшгийн эрсдэлийг бууруулах Азийн сайд нарын хуралд зориулсан үзэсгэлэн Сүхбаатарын талбайд гарч байна. Монгол Улсад хүмүүнлэгийн чиглэлээр үйл ажиллагаа явуулдаг төрийн болон төрийн бус байгууллагууд үйл ажиллагаагаа тэнд сурталчилжээ.  

МУЗН үйл ажиллагаагаа сурталчилсан үзэсгэлэнг Сүхбаатарын талбайд байршууллаа. Мөн эрүүл мэнд, анхны тусламжийг хэрхэн үзүүлдэг талаараа сурталчилж, хүмүүнлэгийн үйл ажиллагаанд оролцохыг уриалсан арга хэмжээг зохион байгуулж байна. 

Энэхүү үзэсгэлэнгийн нээлт өнөөдөр болж Монгол Улсын Шадар сайд Ө.Энхтүвшин болон хуралд оролцож буй төлөөлөгчид оролцсон. МУЗН-ийн Хүүхэд залуучуудын хөдөлгөөний Улаан загалмайчид үзэсгэлэнгийн нээлтэд зориулж,  гамшгийг даван туулах чадавхийг нэмэгдүүлэхийг уриалсан флаш моб бүжиглэж сонирхууллаа.

Мөн Шадар сайд Ө.Энхтүвшин МУЗН-ийн үзэсгэлэнг үзэж сонирхов.