Хөдөлмөрийн бүтээмж 2.3 хувиар буурчээ
Бизнесийн салбар дундаас мэдээлэл, холбооны салбар өнгөрсөн жил хамгийн их хөдөлмөрийн бүтээмжтэй ажилласан бол уул уурхай, олборлолтын салбар хамгийн бүтээмж муутай ажиллажээ.
Эдийн засгийн голлох энэ салбарт бүтээмж яагаад муу байгааг та гайхаж байж болох юм. Учир нь энэ салбарт ажиллах иргэдийн тоо өнгөрсөн онд 30.8 хувиар өссөн ч гарц буюу үйлдвэрлэл 7.1 хувиар буурсан нь энэ салбарын бүтээмж өмнөх оноос 37.9 хувиар буурахад нөлөөлжээ. Харин Мэдээлэл, холбооны салбарт өнгөрсөн онд 14,500 хүн ажиллаж, 394.6 тэрбум төгрөгийн нэмэгдэл өртөг бүтээсэн нь хамгийн өндөр бүтээмжид тооцогдож байна.
Үндэсний Статистикийн Хорооны гаргасан "Хөдөлмөрийн Бүтээмж -2017" тайлангаас бид та бүхэндээ онцлох мэдээллийг хүргэж байна.
График 1, Хөдөлмөрийн бүтээмж (салбараар)
Хөдөлмөр эрхэлж буй хүмүүс хэдий чинээ бүтээмжтэй ажиллана, амьжиргааны түвшин төдий чинээ дээшилж, эдийн засаг өсдөг. Мөн үүнийг дагаад инфляцийн түвшин буурч, өрсөлдөх чадвар нэмэгддэг тул хөдөлмөрийн бүтээмж нь эдийн засгийн нэг гол үзүүлэлт.
Монгол Улсын хөдөлмөрийн бүтээмжийн үзүүлэлтүүдийг Үндэсний статистикийн хороо тусгай аргачлалаар тооцон гаргадаг бөгөөд уг аргачлалыг 2017 оны нэгдүгээр сарын 6-нд шинэчилсэн байдаг. Тэгвэл уг шинэ аргачлалаар 2017 онд хөдөлмөрийн бүтээмж ямар байсныг доорх үзүүлэлтүүд харуулж байна.
Бүтээмжийн үзүүлэлтийг нийт эдийн засаг, бизнесийн сектор болон эдийн засгийн үйл ажиллагааны салбарын түвшинд тооцжээ. Ингэхдээ нийт эдийн засгийн түвшинд хөдөлмөрийн бүтээмжийг нэг ажиллагчид ногдох бодит ДНБ‐ээр хэмждэг байна.
График 2, Хөдөлмөрийн бүтээмж (жилийн өсөлт, бууралт)
Хөдөлмөрийн бүтээмж 2016 онд 1.4 хувиар өссөн бол 2017 онд 2.3 хувиар буурчээ. Гэтэл нэг хүнд ногдох ДНБ (2010 оны зэрэгцүүлэх үнээр) 2016 онд 0.9 хувиар буурсан бол 2017 онд 2.7 хувиар өссөн байна. Өөрөөр хэлбэл, хөдөлмөрийн бүтээмж нэмэгдсэн жилд нь ДНБ багасч, ДНБ өссөн жилд нь хөдөлмөрийн бүтээмж буурсан байгаа биз. Энэ нь хүн амын өсөлт харьцангуй тогтвортой байхад ажиллагчдын тооны өөрчлөлт тогтворгүй байсантай холбоотой аж. Тухайлбал, ажиллагчид 2013 онд 4.4, 2014 онд 0.6, 2015 онд 3.6 хувиар өсөж байсан бол 2016 онд 0.3 хувиар буурч, харин 2017 онд 7.6 хувиар өссөн байна.
ДНБ‐ээр хэмжигдэх гарц нь тухайн улсад үйлдвэрлэсэн бараа, үйлчилгээний нийт өртөг гэсэн үг. ДНБ (2010 оны зэрэгцүүлэх үнээр) 2017 онд урьдчилсан гүйцэтгэлээр 16.1 их наяд төгрөгт хүрч, өмнөх оноос 5.3 хувиар өссөн үзүүлэлттэй байна. 2017 оны байдлаар манай улсад 1,238,300 хүн хөдөлмөр эрхэлж байгаа нь өмнөх оныхоос 7.6 хувиар өссөн дүн юм.
